პრემიერ-მინისტრის, გიორგი გახარიას განცხადებით, რაჭაში სტიქიის შემდეგ ზოგიერთ სოფელთან სრულყოფილი კავშირის აღსადგენად სულ მცირე ერთი თვე დასჭირდება. ამის შესახებ მან ჟურნალისტებს ონის მუნიციპალიტეტში განუცხადა, სადაც დღეს, 30 ივლისს ჩავიდა.

როგორც პრემიერმა თქვა, 12 სოფელი კავშირს იყო მოწყვეტილი, 4 სოფელთან დროებითი კავშირი აღდგა და კიდევ 2 სოფელთან ორშაბათისთვის აღდგება.

"თუმცა დარჩენილ სოფლებზე, როგორიცაა ღები, პატარა ღები, გლოლა და შოვი, როგორც ჩანს გზა, იმდენად სერიოზულადაა დაზიანებული, რომ ამ სოფლებთან სრულყოფილი კავშირის აღდგენას დასჭირდება მინიმუმ ერთი თვე", — განაცხადა გახარიამ.

პრემიერის თქმით, ამ სოფლებს ყველა საჭირო პროდუქტითა და ნივთით მოამარაგებენ.

"რეალურად მაგისტრალურ გზაზე არის სერიოზული ჩამონგრევები, სამი სექტორია, სადაც 250-მეტრიანი დაახლოებით 4 ხიდია, რომელიც სრულად არის აღსადგენი. ჩვენი პირველადი შეფასებით, მხოლოდ მაგისტრალური გზების აღდგენა დამატებით 30 მილიონ ლარს საჭიროებს. საერთო ჯამში, აი, ამ სტიქიის შედეგების აღმოფხვრას შეიძლება 50 მილიონ ლარამდე დასჭირდეს", — თქვა გახარიამ.

რაც შეეხება ელექტროენერგიის აღდგენას, პრემიერ ამბობს, რომ კარგი ამინდის პირობებში ის 7-10 დღეში აღდგება. მისივე თქმით, რამდენიმე ადგილას მოსახლეობა რისკის ზონაში ცხოვრობს, რის გამო შეიძლება გასახლება გახდეს საჭირო.

როგორც გახარია ირწმუნება, გზის გახსნის შემდეგ შეაბამისი სამსახურები ამოვლენ, შეისწავლიან ნიადაგებსა და ღვარცოფულ ქანებს და მიიღებენ ისეთ გადაწყვეტილებების, რომ მოქალაქეები რისკის ქვეშ არ ცხოვრობდნენ.