"სახელმწიფოს ყველა ინსტიტუტი მიტაცებული აქვს რუსულ ოლიგარქიულ რეჟიმს და ქვეყანაში სასამართლო ხელისუფლება აღარ არსებობს", — ასე შეაფასა ერთიანი ნაციონალური მოძრაობის წევრმა, სალომე სამადაშვილმა სასამართლოს გადაწყვეტილება გიორგი რურუას საქმეზე.

"ბიძინა ივანიშვილს ძალიან მძიმედ დაუჯდება ეს გადაწყვეტილება საერთაშორისო ასპარეზზე. გიორგი რურუას ბევრად ნაკლები დრო დარჩა ციხეში, ვიდრე აქამდე გაატარა. იგი ნომბრიდან ზის, ოქტომბრის ბოლოს აუცილებლად შეიცვლება პოლიტიკური ხელისუფლება, ჩვენ შევქმნით ისეთ პოლიტიკურ გარემოს, სადაც აღარ იქნებიან პოლიტიკური პატიმრები და რურუა, რა თქმა უნდა, დატოვებს საპატიმრობს სულ რამდენიმე თვეში", — განაცხადა სამადაშვილმა.

მისი განცხადებით, დღევანდელი სასამართლოს გადაწყვეტილება დამაზიანებელია ჩვენი სახელმწიფოსა და საზოგადოებისთვის და ქართველმა ხალხმა ეს რამდენიმე თვეში სამართლიანი და თავისუფალი არჩევნების გზით უნდა დაასრულოს.

მთავარი არხის მეწილეს, გიორგი რურუას სასამართლომ 4 წელი მიუსაჯა. რურუას ადვოკატის, დიმიტრი საძაგლიშვილის თქმით, მიუხედავად იმისა, რომ სასამართლო სისტემის ნდობა არ აქვთ, განაჩენს სააპელაციო სასამართლოში მაინც გაასაჩივრებენ.

"ჩვენ არაერთხელ ვამბობდით, რომ რურუას საქმეზე გადაწყვეტილებას არ იღებს ვალერიან ბუგიანიშვილი. არ არის ეს მოსამართლე რომელიც შინაგანი რწმენის ან კანონის საფუძველზე ხელმძღვანელობს, ის არის უბრალოდ პოლიტიკური მითითებების შემსრულებელი მოსამართლე", — აღნიშნა საძაგლიშვილმა.

რურუა ერთ-ერთია იმათგან, ვის გათავისუფლებასაც ოპოზიცია 8 მარტის შეთანხმების ფარგლებში ითხოვდა. გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. პროკურატურის განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობისა და მისი შესრულებისათვის ხელის შეშლის შესახებ. ბრალდების მხარე აცხადებს, რომ გიორგი რურუამ უარი განაცხადა სასამართლოს განჩინების მიხედვით დნმ-სა და ხელის კვლევების ნიმუშის აღების თაობაზე. მიმდინარე წლის 15 იანვარს კი გამომძიებელმა განაცხადა, რომ რურუასგან დნმ-ის ნიმუში ნებაყოფლობით აიღეს.