თბილისის მერიის მუნიციპალური ინსპექციის თანამშრომელი ქრთამის აღების ბრალდებით დააკავეს. ინფორმაციას ამის შესახებ სახელმწიფო უსაფრთხოების სამსახური ავრცელებს.

უწყების ინფორმაციით, ინსპექციის დიდუბის რაიონის გარე ვაჭრობის ცვლის უფროსი მის სამოქმედო ტერიტორიაზე, გარე ვაჭრობის მფარველობისათვის, მოქალაქეს ქრთამის სახით ყოველთვიურად 1 000 ლარის გადახდას სთხოვდა. მათივე თქმით, მიმდინარე წლის 29 ივლისს კი მან მოქალაქეს აღნიშნული თანხა გამოართვა.

გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს და იგი ქრთამის აღებას გულისხმობს. დანაშაული სასჯელის სახით თავისუფლების აღკვეთას 6-დან 9 წლამდე ვადით ითვალისწინებს.