გასული წლის მაისში, როცა მსოფლიო სამეფო კარის თამაშების ბოლო სეზონით იმედგაცრუების ალში იყო გახვეული, ჯორჯ მარტინმა თქვა, რომ ყინულისა და ცეცხლის სიმღერის მეექვსე წიგნი მომავალი წლის ზაფხულამდე დასრულებული ექნებოდა. წინააღმდეგ შემთხვევაში კი, ახალი ზელანდიის პოლიციას ჩაბარდებოდა.

განცხადება, რომელსაც მკითხველი თითებგადაჯვარედინებული შეხვდა, როგორც ჩანს, ყურადღების გადატანის გზა იყო, რადგან, ამ დროისთვის მარტინის ახალი წიგნი, როგორც მინიმუმ ამაზონზე, წინასწარ შესაკვეთად უნდა ყოფილიყო დაანონსებული.

როგორც კი ფანები მიხვდნენ, რომ საკულტო საგის ავტორმა კიდევ ერთხელ გაუცრუა იმედი, გადაწყვიტეს, მისი სურვილი განეხორციელებინათ და ახლა მისი დაპატიმრებისთვის ემზადებიან.

რატომ ახალი ზელანდიის პოლიცია?

ქვეყნის ავიაციის თანამშრომლებმა გასულ წელს მარტინისთვის ვიდეო-მიმართვა ჩაწერეს, ახალ ზელანდიაში მიიწვიეს და აღნიშნეს, კუნძულზე ყოფნისას მას წიგნის დასამთავრებლად მუზა ეწვეოდა.

პასუხად კი მან მიუგო:

"საკმარისი ფული მაქვს იმისთვის, რომ ახალ ზელანდიაში ჩემით ჩავიდე. თუ გსურთ, შეგიძლიათ ჩემს ნაცვლად თქვენს ფანებს შესთავაზოთ უელინგტონში ჩაფრენა, დარწმუნებული ვარ ისინი მაშინვე დაგთანხმდებიან და ისევე შეუყვარდებათ ახალი ზელანდია, როგორც — მე".

2020 წლის ზაფხული მარტინს ისედაც ახალ ზელანდიაში ჰქონდა დაგეგმილი, სადაც მსოფლიო სამეცნიერო ფანტასტიკის საერთაშორისო კონვენციას (Worldcon) უნდა დასწრებოდა, რომელიც 29 ივლისიდან 2 აგვისტომდე იყო დაგეგმილი. სწორედ ვორლდკონის ფარგლებში უნდა გამართულიყო Hugo Awards, რომელსაც სწორედ მარტინი წაიყვანდა.

"როცა ვორლდკონისთვის ახალ ზელანდიას ვეწვევი, თუ The Winds Of Winter ხელში არ გექნებათ, თქვენ ხელთ გექნებათ ჩემი წერილობითი თანხმობა დამაპატიმროთ და უაიტ-აილენდში ქოხში დამტოვოთ, სადაც ყოველდღე ვუყურებ გოგირდის ტბებს მანამ, სანამ წიგნს არ დავასრულებ", — აცხადებდა მარტინი 2019 წლის მაისში.

რაც იმას ნიშნავს, რომ მარტინის დედლაინი 29 ივლისს ამოიწურა, როცა ის ვორლდკონს ეწვეოდა, რადგან მისი ახალი წიგნი არც ხელში გვაქვს, არც თაროზე.

რა თქმა უნდა, პანდემიამ ბევრი გეგმა ჩაშალა და ვორლდკონი ონლაინ იმართება, მარტინი კი სულაც არ ჩასულა ახალ ზელანდიაში. შეიძლება მან ამჯერად თავი იმით იმართლოს, რომ სიტყვაში გვაჯობა, და მხოლოდ იმ შემთხვევაში მოვიხელთებდით მის ახალ წიგნს ზაფხულამდე, თუ ის კუნძულს ეწვეოდა. პანდემია კი მის მიზეზად არ გამოდგება, რადგან ხელოვანები შედევრებს ხშირად თვით იზოლაციაში ქმნიან.

2020 წლის ივნისში, მარტინმა გაგვიმხილა, რომ წიგნის წერის პროცესი წინ მიიწევს და ამაში სწორედ თვითიზოლაცია დაეხმარა:

"გუშინ ახალი თავი დავასრულე, 3 დღის წინ — წინა თავი და 1 კვირის წინ კიდევ სხვა თავი. თუმცა, ეს არ ნიშნავს, რომ წიგნი ხვალ უკვე მზად იქნება, ან მომავალ კვირას გამოქვეყნდება. დიდი წიგნია და მის დასრულებამდე კიდევ გრძელი გზა მაქვს გასავლელი".

ნებისმიერ შემთხვევაში, საეჭვოა, რომ მარტინის მკითხველი რომელიმე მიზეზის მისაღებად იყოს მზად. ისინი მის უპირობო პატიმრობას განიხილავენ.

"ხომ გაიგეთ რა თქვა"

"ციხე ჯორჯისთვის, ციხე ჯორჯისთვის, 1000 წლით!"

"ახლავე მოვიტან ბორკილებს"

საგიდან მეექვსე წიგნს მარტინი 10 წელზე მეტია წერს.