თეთრი ხმაურის მოძრაობის აქცია დეკრიმინალიზაცია 2016 პარლამენტის ყოფილ შენობასთან უკვე დაიწყო.

მოძრაობას მიაჩნია, რომ სწორედ ეს თარიღი, რომელიც ადამიანის უფლებების დღეს უკავშირდება, უნდა იქცეს, მათი თქმით, 10 წლიანი რეპრესიული ნარკოპოლიტიკის სიმბოლური დასასრულის დღედ:

"10 დეკემბერს ჩვენ, საზოგადოება, საბოლოდ ვაცხადებთ, რომ ამოიწურა დრო, როდესაც
ადამიანებს ნარკოტიკული საშუალებების მოხმარების გამო სახელმწიფო პოლიტიკა საკუთარი
ძალადობის ინსტრუმენტებად აქცევდა, სტატისტიკის, ბიუჯეტისა და ციხის შესავსებად იყენებდა. საზოგადოება უკვე დიდი ხანია შეთანხმდა მოხმარების დეკრიმინალიზაციაზე".

თეთრი ხმაურის მოძრაობის ინფორმაციით, ნარკოპოლიტიკის ეროვნული პლატფორმის ფარგლებში მზადდება საკანონმდებლო ინიციატივაც, რომელიც ამ პლატფორმაში გაერთიანებულ ორმოცამდე ორგანიზაციას, სადამსჯელო ნარკოპოლიტიკის ერთადერთ მართებულ ალტერნატივად მიაჩნია.

აქციის მთავარი მოთხოვნაა ხელისუფლებამ წელსვე გამოაცხადოს მოხმარების
დეკრიმინალიზაცია ნარკოპოლიტიკის ლიბერალიზაციის პროცესში დეკლარირებულ
მიმართულებად და დაუყოვნებლივ დაიწყოს მუშაობა სადამსჯელო პოლიტიკის ჯანდაცვის
მიდგომებით ჩანაცვლებაზე.

თეთრი ხმაურის მოძრაობა აცხადებს, რომ მოთხოვნების შეუსრულებლობის შემთხვევაში, ეს იქნება მათ მიერ გამართული ბოლო მშვიდობიანი აქცია. გაიგეთ მეტი.