გირჩის ლიდერი, იაგო ხვიჩია ეხმაურება გიგი უგულავას ბრიფინგს, რომ ოპოზიცია რეგიონებში საერთო მაჟორიტარულ კანდიდატებზე ვერ თანხმდება. 27 ივლისს გამართულ პრესკონფერენციაზე ხვიჩიამ მოუწოდა ნაციონალურ მოძრაობას, ნუ შეაფერხებენ ოპოზიციის კონსოლიდაციას და დაუბრუნდნენ მოლაპარაკების მაგიდას:

"ჩვენ გვქონდა ნათქვამი, რომ არ დავაყენებდით არსად მაჟორიტარებს, რომ არ შეფერხებულიყო საერთო ოპოზიციური კანდიდატების დაყენების პროცესი. მოვუწოდებთ ნაციონალურ მოძრაობას, მთავარ ოპოზიციურ პარტიას, რომელიც ყველაზე მეტად არის პასუხისმგებელი, მოხდეს ოპოზიციის კონსოლიდაცია და მან ხელი უნდა შეუწყოს ამ პროცესს, ნუ იქნება ამის შემაფერხებელი.

თუკი ნაციონალური მოძრაობა არ დაუბრუნდება მაგიდას, ჩვენ, გირჩს მოგვიწევს, ინდივიდუალურად, მაჟორიტარების კანდიდატებთან საუბარი იმ იდეებზე, რაც გირჩს გააჩნია და ამის შემდეგ მხარდაჭერა. გვინდა რომ ოპოზიცია საერთო მაჟორიტარული კანდიდატებით გავიდეს არჩევნებზე. ეს არის გამარჯვების წინაპირობა".

დღეს, 27 ივლისს ევროპული საქართველოს ლიდერმა გიგი უგულავამ ბრიფინგი გამართა და ოპოზიციურ პარტიებს საერთო მაჟორიტარ კანდიდატებზე შესაჯერებლად კონსულტაციების განახლებისკენ მოუწოდა. მანვე მოუწოდა ნაციონალურ მოძრობას, რომ ამ მიმართულებით მათთან თანამშრომლობა გააგრძელონ.

უგულავამ ბრიფინგზე აღნიშნა, რომ ენმ-სთან რეგიონებში საერთო კანდიდატებზე კონსულტაციები ჰქონდათ, თუმცა პარტიის პოზიციაა, რომ თბილისს გარეთ, 22 ოლქში საკუთარი კანდიდატი ჰყავდეთ.

საკონსულტაციო ფორმატში გაერთიანებულმა ოპოზიციამ თბილისის 8 მაჟორიტარულ ოლქში საერთო კანდიდატი წარადგინა. უგულავამ ნაციონალურ მოძრაობას მადლობა გადაუხადა თბილისის მაჟორიტარ კანდიდატებზე თანამშრომლობისთვის და აღნიშნა, რომ ამ შეთანხმებას უნდა დაეფუძნოს ოპოზიციის საერთო კოორდინაცია.