ახალ ინტერვიუში ამერიკელმა მომღერალმა Doja Cat-მა განაცხადა, რომ მას ცოტა ხნის წინ კორონავირუსი დაუდასტურდა.

როგორც 24 წლის მომღერალმა აღნიშნა, ის თავს ახლა უკეთ გრძნობს და ინფიცირების წყაროდ საჭმლის მიტანის სერვისი, Postmates დაასახელა.

"COVID მაქვს. არც კი ვიცი, როგორ დავინფიცირდი, მაგრამ მგონია, რომ რაღაც Postmates-ით გამოვიძახე და არ ვიცი როგორ, მაგრამ სწორედ მაშინ მქონდა ვირუსთან კონტაქტი. ახლა თავს კარგად ვგრძნობ. სიმპტომების გამო ოთხი დღე შეშინებული ვიყავი, მაგრამ ახლა ყველაფერი კარგადაა", — განაცხადა Doja Cat-იმ.

Variety-ის ცნობით, ეს ცნობილი რეპერი მანამდე სწორედ კორანავირუსზე გაკეთებული განცხადებების გამო კრიტიკის ქარცეცხლში გაეხვა: ის პანდემიას სერიოზულად არ აღიქვამდა და ინფექციას გრიპის ვირუსს ადარებდა.

"ვაპირებ, კორონა დამემართოს, რადგან საერთოდ არ მადარდებს ეს ვირუსი. ეს უბრალო გრიპია. მიიღეთ გაციების საწინააღმდეგო წამალი, დალიეთ წყალი ან ჩაი და დაიძინეთ — ამის მეტი არც არაფერია საჭირო", — ამბობდა მომღერალი მარტში.

Doja Cat-იმ განსაკუთრებული პოპულარობა ბოლო ორი წლის განმავლობაში მოიხვეჭა სიმღერებით Juicy და Say So, რომლებიც სოციალურ მედია TikTok-ის ჰიტები გახდა.