სისუფთავის, სიწმინდის, პატიოსნების, ბრძოლისა, სიამაყის სიმბოლო და აღმშენებლობის იდეა — ამ და სხვა ეპითეტებით შეაფასა ახალი საქართველოს ლიდერმა, გიორგი ვაშაძემ თავისი პოლიტიკური პლატფორმის, სტრატეგია აღმაშენებლის ლოგო. ახალი გაერთიანება ვაშაძემ თაკო ჩარკვიანთან ერთად შექმნა, რომელთან ერთადაც ოპოზიცის ერთობა — ძალა ერთობაშია დატოვა.

"თეთრი ფერი, ეს არის სისუფთავის, სიწმინდის, პატიოსნების სიმბოლო. წითელი ფერი, ეს არის ბრძოლის, გამარჯვების ეროვნული ფერი, რომლითაც ჩვენ უნდა ვიყოთ ამაყი. ჯვრები გამოსახული, ეს არის ისტორიულად საქართველოს სიმბოლო და ზოგადად, ქრისტიანული საზოგადოების სიმბოლო. სტრატეგია, არის ის, რაც სჭირდება დღეს საქართველოს. აღმშენებლობა კი არის ის იდეა, რომელიც დაამარცხებს დამსხვრეული ოცნებების პარტიას", — განაცხადა ვაშაძემ.

ფოტო: გიორგი ვაშაძე / FB

ლოგოს წარდგენის შემდეგ სიტყვა თაკო ჩარკვიანს გადაეცა, რომელმაც ახალი გაერთიანების სახელი კიდევ უფრო დეტალურად ახსნა და დასძინა, რომ თეორიტიკოსი პოლიტიკოსების დრო აღარ არის და იმ პოლიტიკოსების დროა, რომელთაც უკვე გაუკეთებიათ წარმატებული პროექტები.

"რაც შეეხება სტრატეგია აღმაშენებელს, ეს სახელი შემთხვევით არ არის. ეს არის აღმშენებლობის გზა, სიახლე, სამართალი, რომელიც ჩვენს ქვეყანას აკლია და ის პიროვნებები, რომელთათვისაც დღეს ჩვენი კარი ღიაა".

მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.

"ამაზე დეტალურად 30 ივლისს 12:00 საათზე გესაუბრებით იქ, სადაც წარვადგენთ ჩვენს საარჩევნო გეგმას",— აღნიშნა გიორგი ვაშაძემ.

კოალიცია, რომელიც ვაშაძემ და ჩარკვიანმა დატოვეს, 2018 წელს, როგორც საპრეზიდენტო არჩევნებისას მმართველი პარტიის, ქართული ოცნების ოპოზიციური ალიანსი შეიქმნა.