პროკურატურა წალენჯიხის საკრებულოს თავმჯდომარისა და აპარატის თანამშრომლისთვის პატიმრობის შეფარდებას ითხოვს. უწყების განცხადებით, ამ შუამდგომლობით სასამართლოს მიმართავენ.

ფინანსთა სამინისტროს საგამოძიებო სამსახურში ამბობენ, რომ საქმე ეხება ჯგუფურად, მარკირებას დაქვემდებარებული განსაკუთრებით დიდი ოდენობით აქციზური საქონლის, აქციზური მარკის გარეშე გადაზიდვის ფაქტს. უწყების ცნობით, გამოძიებამ დაადგინა, რომ ბრალდებულებმა 34071 ლარის ღირებულების, აქციზური მარკის სავალდებულო დართვას დაქვემდებარებული 8310 კოლოფი სიგარეტი Manchester-ი გადაზიდეს.

გამოძიება მიმდინარეობს საქართველოს სისხლის სამართლის კოდექსის მე-200 მუხლის მე-2 და მე-3 ნაწილებით, რაც მარკირებას დაქვემდებარებული აქციზური საქონლის აქციზური მარკის გარეშე გამოშვება, შენახვა, რეალიზაციას ან გადაზიდვას გულისხმობს. დანაშაული სასჯელის სახით ითვალისწინებს თავისუფლების აღკვეთას ექვსიდან რვა წლამდე ვადით.