"ვიღაც პოლიტიკური მოღვაწეების გამო, როგორ წარმოგიდგენიათ ეს [მოთხოვნა] სერიოზულია? არასერიოზულია", — ასე უპასუხა პრემიერმინისტრმა, გიორგი გახარიამ ჟურნალისტების კითხვას შინაგან საქმეთა მინისტრის გადადგომის მოთხოვნასთან დაკავშირებით.

"შსს-ს ამოცანაა, გამოძიების ბოლომდე მიყვანა და დასრულება. არანაირი კითხვის ნიშნები ამასთან დაკავშირებით არ არსებობს, დარწმუნებული ვარ, რომ ორივე საქმე სრულფასოვნად იქნება გამოძიებული", — განაცხადა გახარიამ.

აღნიშნული მოთხოვნა პარტია ჩვენი საქართველო – სოლიდარობის ალიანსის წევრებმა 23 ივლისს გამართულ ბრიფინგზე წამოაყენეს. პარტიის წევრები პარლამენტის დამოუკიდებელი დეპუტატები მარიამ ჯაში, გედევან ფოფხაძე, ბექა ნაცვლიშვილი და ლევან გოგიჩაიშვილი არიან.

მათი თქმით, ვახტანგ გომელაური დაკისრებულ ვალდებულებებს თავს ვერ ართმევს.