ევროპული საქართველოს ერთ-ერთი ლიდერის, გიგი უგულავას თქმით, თუ ერთობლივი ძალისხმევა არ იქნება, 2030 წლამდე, შეიძლება, "ბაყაყებივით ჭაობში" ისხდნენ.

მისი თქმით, საქართველოს არა აქვს ჭაობში ყოფნის ფუფუნება და მას რეგიონში პოზიციების გაძლიერება სჭირდება.

"ივანიშვილი არ არის რიგითი მთავრობა და რიგითი გამოწვევა. ეს არის სერიოზული გამოწვევა. თუ ერთობლივი ძალისხმევა არ იქნება, შეიძლება, ივანიშვილი შეგვრჩეს 2030 წლამდე და ვისხდეთ ბაყაყებივით ამ ჭაობში და ვიყიყინოთ. ამ ჭაობს ბოლოს გადაიბარებს რუსეთი", — განაცხადა უგულავამ პალიტრანიუსის ეთერში.

როგორც უგულავა ამბობს, საქართველო დღეს საგარეო და საშინაო პოზიციის არმქონე ქვეყანაა.

"ჩვენ არ გვაქვს იმის ფუფუნება, რომ ვიყოთ ჭაობში და ვიყოთ "სამოსნები". საქართველო უნდა იყოს "ხუთოსანი", რომ ყოველთვის მისი პოზიციები იყოს ძლიერი. ჩვენ ახლა ვართ "სამოსანი", ივანიშვილის ხელში დამალული, დაჩაგრული, დაბეჩავებული", — განაცხადა უგულავამ.

ოპოზიციურმა ერთობა თბილისში მაჟორიტარობის 6 კანდიდატზეა შეთანხმებული.

ამ ეტაპზე დანარჩენი 2 ოლქის კანდიდატი უცნობია და პოლიტიკოსები აცხადებდნენ, რომ კონსულტაციები გრძელდება. რაც შეეხება 6 ოლქს, კანდიდატები ასე გადანაწილდა:

  • ნაძალადევი — შალვა ნათელაშვილი;
  • მთაწმინდა-კრწანისი — შალვა შავგულიძე;
  • ვაკე — ელენე ხოშტარია;
  • ისანი — გიორგი ვაშაძე;
  • სამგორი — ლევან ხაბეიშვილი
  • გლდანი — ნიკა მელია.