საქართველოს საპატრიარქოს განცხადებით, ნავთლუღში მდებარე წმინდა ქალწულმოწამე ბარბარეს სახელობის ტაძარში სარემონტო სამუშაოების ამსახველი ფოტოები ძველია, თუმცა დეკანოზ ისე არხოზაშვილის ნებართვა არც მაშინ უთხოვია.

მათივე ინფორმაციით, დეკანოზი 20 ივლისს საპატრიარქოში იყო დაბარებული და სწორედ მან განმარტა, რომ სარემონტო-სარეკონსტრუქციო სამუშაოები 17 წლის წინ დასრულდა.

"თუმცა, აქვე გარკვევით აღვნიშნავთ, რომ ეს ფაქტი არ ამართლებს ტაძარში ჩატარებულ თვითნებურ სარემონტო სამუშაოებს; დეკანოზ ისე არზოხაშვილს თავის დროზე ნებართვისთვის არ მოუმართავს არც საქართველოს საპატრიარქოს ხუროთმოძღვრების საბჭოსთვის და არც საქართველოს კულტურული მემკვიდრეობის დაცვის ეროვნული სააგენტოსათვის, რაც აუცილებელი პირობაა ნებისმიერ კულტურული მემკვიდრეობის ძეგლზე ამგვარი სამუშაოების შესასრულებლად", — აღნიშნულია განცხადებაში.

მათივე თქმით, ამ ეტაპზე მიმდინარეობს აღნიშნული ფაქტის დეტალურად შესწავლა და უახლოეს დღეებში გახდება ცობილი, როგორ აღმოიფხვრება დარღვევები.

ინფორმაცია მე-19 საუკუნის წმინდა ბარბარეს სახელობის ტაძარში ისტორიული საფლავების განადგურების შესახებ თეოლოგმა, გიორგი ტიგინაშვილმა სოციალური ქსელით 19 ივლისს გაავრცელა, კულტურული მემკვიდრეობის სააგენტოში კი დაადასტურეს. სააგენტოს განცხადებით, შესაძლებელია, დადგეს ვინმეს სამართლებრივი პასუხისმგებლობის საკითხი.

თეოლოგის განმარტებით, ეკლესიაში განადგურდა თავადი სუმბათაშვილების მე-19 საუკუნის საფლავები და მათი წარწერები, რაც დიდი ისტორიული დანაკლისია, რადგან ეპიგრაფიკული ძეგლები მეცნიერულად შესწავლილი და ფოტოფიქსირებული არ იყო.

ტიგინაშვილი ფოტოებსაც ავრცელებს, სადაც ჩანს, როგორ გამოიყურებოდა ეკლესია, როგორ აყარეს საფლავის ქვები და ჩაანაცვლეს ის მეტლახით.

ეს პირველი შემთხვევა არ არის, როდესაც თვითნებურად დაწყებული რეაბილიტაციის გამო ისტორიული ძეგლები ზიანდება. სასულიერო პირები ეკლესიებში ხან კარადებს აშენებენ, ხან კი ბარელიეფებს მეტლახითა და კაფელით ანაცვლებენ.