ევროპული საქართველოს წევრის, გიორგი კანდელაკის თქმით, ეკონომიკის მინისტრის, ნათია თურნავას დღევანდელმა განცხადებამ დაადასტურა, რომ მთავრობას გადაწყვეტილი აქვს Ryanair-ის და Wizz Air-ის არჩევნებამდე რეგულარული ფრენები აუკრძალოს.

როგორც კანდელაკი აღნიშნავს, ქართული ოცნების მთავრობის მიდგომა არამეცნიერულია და მხოლოდ არჩევნებს უკავშირდება.

"ეკონომიკის მინისტრმა ნათია თურნავამ ფაქტიურად დაადასტურა, რომ მთავრობის პრინციპული გადაწყვეტილებაა, რომ არჩევნებამდე იყოს რაც შეიძლება ცოტა და ძვირი ფრენა და ფაქტიურად იკრძალება Wizz Air-ის და Ryanair-ის რეგულარული რეისები არჩევნებამდე, რითაც მთავრობა შიმშილისთვის წირავს ტურიზმის სფეროზე დამოკიდებულ ათასობით ადამიანს, რომელიც იმედის თვალით შეჰყურებდა ამ ორი ავიაკომპანიის რეგულარული რეისების განახლებას," — განაცხადა კანდელაკმა.

კანდელაკის თქმით, თურნავამ იცრუა, როცა თქვა, რომ Ryanair-სა და Wizz Air-ისთვის კვირაში ორჯერ ან ერთხელ ფრენა წამგებიანია.

"მოდით, ქალბატონო ნათია თავად ავიაკომპანიებმა გადაწყვიტონ რა არის მათთვის მომგებიანი და რა წამგებიანი. პანდემიამდე მათი რეისების უმრავლესობა ისედაც კვირაში ორჯერ და მაქსიმუმ სამჯერ ხორციელდებოდა", — განაცხადა კანდელაკმა.

ნათია თურნავას განმარტებით, Ryanair და Wizz Air რეგულარულ ფრენებს იმიტომ არ ასრულებენ, რომ კვირაში ერთხელ ვერ იფრენენ, რადგან ამ შემთხვევაში ეს ავიაკომპანიები საკუთარი ბიზნესმოდელის მდგრადობას ვერ შეინარჩუნებენ.

"ანუ მათთვის წამგებიანი იქნება. ამიტომ მათთან მოლაპარაკება მიმდინარეობს. ამ ეტაპზე მათი შემოთავაზება არის რამდენიმე მიმართულება. ბოლოს ათზე მეტი მიმართულება ჰქონდათ შემოთავაზება. ეს კვირაში ოცზე მეტ ფრენასა და ადამიანების ძალიან დიდ ნაკადს გულისხმობს. ჩვენ როცა ამისთვის მზად ვიქნებით და ის ქვეყნებიც მზად იქნებიან, საიდანაც ავიაკომპანიები ფრენებს გვთავაზობენ, ამას დავუშვებთ", — განაცხადა თურნავამ.