ტურიზმის ეროვნული ადმინისტრაციის ხელმძღვანელის განცხადებით, შიდა ტურიზმი მზარდი ტრენდია და შაბათ-კვირას დატვირთულობის კოეფიციენტმა 70-80%-ს მიაღწია. ამის შესახებ მარიამ ქვრივიშვილმა საკოორდინაციო საბჭოს სხდომის შემდეგ ისაუბრა.

"რა თქმა უნდა, შიდა ტურიზმი ვერ ჩაანაცვლებს იმ საერთაშორისო მოგზაურების მოცულობას, რაც ჩვენ გვქონდა, მათ შორის, გასულ წლებში, თუმცა ვხედავთ, რომ შიდა ტურიზმი ჩვენს ქვეყანაში ძალიან პოზიტიური და მზარდი ტრენდია. მოხარულები ვართ, რომ ბოლო სტატისტიკებით გარკვეულ კურორტებზე, სადაც, რა თქმა უნდა, უფრო მეტად ჭარბია ტურისტული ინფრასტრუქტურა, განსაკუთრებით შაბათი-კვირა, პარასკევის პერიოდში დატვირთულობის კოეფიციენტმა მიაღწია 70%-დან 80%-მდე", — განაცხადა ქვრივიშვილმა.

მისივე თქმით, არსებობს მოლოდინები, რომ შიდა ტურიზმზე მოთხოვნა კიდევ უფრო გაიზრდება.