სახელმწიფო უსაფრთხოების სამსახურის განცხადებით, მთავარ არხზე გასული სიუჟეტი კორონავირუსის სტატისტიკის შესახებ, დამახინჯებულია. უწყებაში ამბობენ, რომ მედიის წინააღმდეგ შემდგომი სამართლებრივი რეაგირების საკითხი განისაზღვრება.

"გამოძიების პროცესში, გამოიკითხა ტელეკომპანია მთავარი არხის, შაბათის მთავარში გასული რეპორტაჟის ყველა ფიგურანტი და რესპოდენტი. რის შედეგადაც დადასტურდა, რომ რესპოდენტების აზერბაიჯანულენოვანი ინტერვიუები, სიუჟეტის ავტორთა მიერ, განზრახ იყო დამახინჯებული.

შეკრებილი მტკიცებულებების ანალიზის საფუძველზე განისაზღვრება შემდგომი სამართლებრივი რეაგირების საკითხი", — ნათქვამია წერილში

სიუჟეტი მთავარი არხის ეთერში 20 ივნისს გავიდა. რესპონდენტები მარნეულიდან ტელევიზიასთან საუბრისას აცხადებდნენ, რომ კონკრეტულ პირებს 10 000 ლარი შესთავაზეს იმის სანაცვლოდ, რომ ოჯახის წევრის გარდაცვალების მიზეზად კორონავირუსი დაესახელებინათ.