ტურიზმსა და არსებულ პირობებში მისი განვითარების შესაძლებლობებზე საუბრისას ნათია თურნავამ განაცხადა, რომ "არ უნდა დავხარბდეთ" ერთჯერად საზღვრების გახსნას:

"ყველანი ვთანხმდებით იმაზე, რომ უნდა ვიყოთ ძალიან ფრთხილად, არ უნდა დავხარბდეთ ერთჯერად, სწრაფ და ეფექტურ გადაწყვეტილებას, რომ გავხსნათ ყველასთან საზღვრები, თუმცა ამის შესაძლებლობას იძლევა ის, რომ ჩვენ 15 ქვეყანაში ვართ მოხვედრილი. შესაძლოა, ისე მოხდეს, რომ 2-3 კვირის თავზე საპირისპირო გადაწყვეტილების მიღება და გარკვეული დარგების ისევ დახურვა მოგვიწიოს, რასაც ჩვენი ეკონომიკა ვერ გადაიტანს", — განაცხადა ეკონომიკისა და მდგრადი განვითარების მინისტრმა.

თურნავამ აღნიშნა, რომ ბაზარი ბიზნესვიზიტორებისთვის გახსნილია და იმედი გამოთქვა, რომ შემოსული ბიზნესმენები მხოლოდ საქმიანი ვიზიტით არ შემოიფარგლებიან, ამ შანსს ხელიდან არ გაუშვებენ და ქვეყანას ტურისტულადაც დაათვალიერებენ.

საქართველომ ევროკავშირის წევრ 5 ქვეყანას გერმანიას, საფრანგეთს, ლიეტუვას, ლატვიასა და ესტონეთს საზღვარი უპირობოდ გაუხსნა. ამ ქვეყნების რეზიდენტებს შეეძლებათ ყველა სახის ვიზიტი საქართველოში, მაგრამ მხოლოდ პირდაპირი საჰაერო მიმოსვლის საშუალებით. ამ ქვეყნებიდან შემოსულ საქართველოს მოქალაქეებს კი კარანტინის გავლა მოუწევთ.

ისეთ ქვეყნებს (რომლებმაც საქართველო ე.წ. მწვანე სიაში შეიყვანა) საქართველომ საზღვარი 14-დღიანი ფასიანი კარანტინის პირობით გაუხსნა. ხოლო იმ ქვეყნებს, რომლებმაც საქართველოს საზღვარი არ გაუხსნეს, არც საქართველო უხსნის საზღვარს.