კორონავირუსის დღეს დადასტურებული 8 ახალი შემთხვევიდან 5 აჭარაში, ერთ ოჯახში გამოვლინდა. აჭარის ავტონომიური რესპუბლიკის ჯანდაცვის მინისტრის მოადგილის ინფორმაციით, მათი ინფიცირების წყარო ოჯახის წევრია, რომელიც სატვირთო ავტომობილის მძღოლია და საქართველოში ლარსის გავლით 2 ივლისს შემოვიდა.

"ჩვენი ინფორმაციით, საზღვარზე იყო გატესტილი და ჰქონდა უარყოფითი პასუხი. ის სამ რიცხვში იმყოფებოდა ერთი დღით თავის ოჯახში, ვიდრე შემდეგ მარშრუტს განახორციელებდა. როცა თურქეთიდან დაბრუნდა [9 ივლისს], უკვე ჩვენთან, სარფის სასაზღვრო-გამშვებ პუნქტზე სწრაფი ტესტით იქნა გამოვლენილი დადებითი პასუხი, რაც PCR ტესტით დადასტურდა", — ამბობს ნიჟარაძე.

რაც შეეხება მძღოლის ოჯახის ხუთ წევრს, ინფიცირებულებს შორის ორი ბავშვია — ერთი ოთხი წლის და მეორე წლამდე ასაკის. მინისტრის მოადგილის თქმით, მათ ერთჯერადად დაუფიქსირდათ ცხელება. რაც შეეხება ოჯახის კიდევ სამ წევრს, ისინი საშუალო ასაკისანი არიან და როგორც ნიჟარაძე ამბობს, "პრაქტიკულად არანაირი ჩივილი არ აქვთ".

ჯანდაცვის მინისტრის მოადგილემ ასევე თქვა, რომ უკვე აღრიცხულია მძღოლთან ახლო კონტაქტში მყოფი 18 ადამიანი, მისი ოჯახის 5 წევრი სწორედ მათ შორის იყო. ნიჟარაძის თქმით, სხვებს ამ დროისთვის ვირუსი დადასტურებული არ აქვთ და მკაცრ იზოლაციაში იმყოფებიან. სამინისტრო აგრძელებს სხვა კონტაქტების მოძიებასაც.

სატვირთო მანქანის მძღოლი ბათუმის რესპუბლიკურ საავადმყოფოშია გადაყვანილი. იქვე მოათავსეს მისი ოჯახის ერთი წევრიც. ხოლო ორი ბავშვი და ორი ზრდასრული თბილისში გადმოიყვანეს.