სოციალურ მედიაში კრიტიკის შემდეგ მსახიობმა ჰალი ბერიმ განაცხადა, რომ ის მომავალ ფილმში ტრანსგენდერი კაცის როლს აღარ შეასრულებს.

რამდენიმე დღის წინ ინსტაგრამზე მსახიობმა თავის სამომავლო გეგმებზე ისაუბრა და აღნიშნა, რომ მალე ახალ ფილმში ტრანსგენდერი პერსონაჟის როლის შესრულებას აპირებდა:

"მომავალ ფილმში, რომელში მონაწილეობაც ძალიან მიხარია, ტრანსგენდერი კაცის როლს შევასრულებ", — განაცხადა მან ინტერვიუსას.

სწორედ ამის გამო მსახიობს როგორც რიგითი აქტივისტები, ისე სხვადასხვა ორგანიზაციები გამოეხმაურნენ და მოუწოდეს, ამ როლის შესრულებაზე უარი ეთქვა, რადგან კინოინდუსტრიაში ტრანსგენდერი ადამიანები უამრავ დაბრკოლებას აწყდებიან და უფრო მეტად სწორედ მათ უნდა მიეცეთ თავიანთი ისტორიების რეპრეზენტაციის საშუალება.

ამის შემდეგ ჰალი ბერიმ ტვიტერზე გამოაქვეყნა განცხადება და აღნიშნა, რომ ამ როლს აღარ შეასრულებს:

"ამ დღეების განმავლობაში შესაძლებლობა მქონდა, რომ მომავალ ფილმში ტრანსგენდერი კაცის როლის შესრულებასთან დაკავშირებით მიმდინარე განხილვებისთვის თვალი მიმედევნებინა და ბოდიშს ვიხდი აღნიშნულის გამო. ვხვდები, რომ როგორც სისგენდერ ქალს, ამ როლზე საკუთარი თავი არ უნდა მომეაზრებინა და ტრანსგენდერ ადამიანებს უდავოდ უფრო მეტი შესაძლებლობა უნდა ჰქონდეთ, რომ თავიანთი გამოცდილების შესახებ თავად გვიამბონ.

მადლიერი ვარ ამ საჭირო მითითებებისა და კრიტიკული საუბრებისთვის და მომავალშიც გავაგრძელებ მოსმენას, შემეცნებას და ამ შეცდომისგან გაკვეთილის სწავლას".

მსახიობის ამ განცხადებას ბევრი დადებითად შეხვდა: LGBTQ ადამიანების უფლებათა დაცვის საერთაშორისო ორგანიზაცია GLAAD-მა აღნიშნა, რომ კარგი იქნება, თუ ბერის გადაწყვეტილებას სხვა ბევრი ცნობილი ადამიანიც გაითვალისწინებს და მომავალშიც მსგავსად მოიქცევა.

ბოლო წლებში ჰოლივუდში ამ საკითხის გარშემო აქტიური დისკუსიები მიმდინარეობს: LGBTQ თემის წევრები ხშირად აღნიშნავენ, რომ მათ კინო თუ სატელევიზიო ინდუსტრიაში წარმატების მისაღწევად რთული გზის გავლა უწევთ, სანაცვლოდ კი მათი იდენტობისა და გამოცდილების შესახებ როლებს ჰეტეროსექსუალი ადამიანები ასრულებენ და მნიშვნელოვან ჯილდოებსაც იღებენ.

წელს ამასთან დაკავშირებით დოკუმენტური ფილმი Disclosure გამოვიდა, რომელშიც ტრანსგენდერი მსახიობები თავად მოგვითხრობენ, თუ როგორ ხდება მათი რეპრეზენტაცია კინოში, სერიალებსა და მედიაში.

Orange Is the New Black-ის მსახიობი ლავერნა კოქსი დოკუმენტურ ფილმში Disclosure.

ფოტო: Netflix

ეს პირველი შემთხვევა არ არის, როცა ცნობილი მსახიობი ტრანსგენდერის როლის შესრულების გამო გააკრიტიკეს: 2018 წელს საჯარო განხილვების შემდეგ სკარლეტ იოჰანსონმაც უარი განაცხადა, რომ ტრასგენდერის როლი შეესრულებინა.