ბათუმის საქალაქო სასამართლომ თავისუფლების უკანონო აღკვეთასა და ძალადობაში ბრალდებულ ხუთივე პირს აღკვეთი ღონისძიების სახით პატიმრობა შეუფარდა.

დაცვის მხარე დაკავებულებისთვის გირაოს ითხოვდა, თუმცა სასამართლომ ბრალდების შუამდგომლობა დააკმაყოფილა, რომელიც პატიმრობას ითხოვდა.

ადვოკატი ზვიად მარკოძე ამბობს, რომ სასამართლოს გადაწყვეტილება დაუსაბუთებელია, რადგან ყველა ბრალდებული თავისი ფეხით გამოცხადდა საგამოძიებო ორგანოში და წარსულში ნასამართლევი არაა.

გამოძიების მტკიცებით, ბრალდებულებმა შურისძიებისთვის დაზარალებული მანქანაში ძალით ჩასვეს და ოზურგეთის მუნიციპალიტეტის სოფელ ბოხვაურში, ერთ-ერთი მოქალაქის სახლში წაიყვანეს, სადაც მას ფიზიკურად გაუსწორდნენ.

გამოძიება სისხლის სამართლის კოდექსის 143-ე მუხლის მესამე ნაწილის "ა" ქვეპუნქტით და 126-ე მუხლის პირველი პრიმა ნაწილის "ბ" ქვეპუნქტით მიმდინარეობს, რაც თავისუფლების უკანონო აღკვეთასა და ჯგუფურად ჩადენილ ძალადობას გულისხმობს. მათ 2-დან 10 წლამდე თავისუფლების აღკვეთა ემუქრებათ.