პატრიოტთა ალიანსის წევრი ადა მარშანია ირაკლი კობახიძეს პასუხობს და ამბობს, რომ საკონსტიტუციო ცვლილებების მეორე კენჭისყრაზე არა ნაციონალურ მოძრაობასთან მოლაპარეკების, არამედ ჯანმრთელობის მდგომარეობის გამო არ იყო. მარშანიას თქმით, ნაციონალური მოძრაობის წევრები მას გამარჯობასაც კი არ ეუბნებიან და მოლაპარაკებებს ვერც გაუბედავდნენ.

როგორც მარშანია ამბობს, თავად კობახიძეა ნაციონალურ მოძრაობასთან "კრიმინალური კოჰაბიტაციით პოლიტიკურ ლაფში ამოსვრილი".

"ერთადერთი მიზეზი, რატომაც არ ვიყავი მეორე კენჭისყრის დროს სხდომათა დარბაზში, არის ჩემი პირადი საქმე, ჯანმრთელობა. მქონდა საშინლად მაღალი წნევა, ესაა ერთადერთი მიზეზი. ნაციონალური მოძრაობა ჩემთან მოსალაპარაკებლად და გადასაბირებლად კი არა, გამარჯობის სათქმელად ახლოს არ მოდის. სწორია და კარგია ეს. მე მაქვს მათთან ასეთი ურთიერთობები და როგორ გამიბედავდა მე ნაციონალური მოძრაობა რაღაც შავ-ბნელ მოლაპარაკებებს? ირაკლი კობახიძემ თავის თავს შეხედოს კარგად დიდი დურბინდით, რომ ლაფშია ამოსვრილი", — განაცხადა მარშანიამ.

ქართული ოცნების დეპუტატი, ირაკლი კობახიძე ნაციონალურ მოძრაობას საკონსტიტუციო ცვლილებების ჩაგდების მცდელობაში ადანაშაულებს. მან ამის მაგალითად პატრიოტთა ალიანსის დეპუტატების მაგალითი მოჰყავს და ამბობს, რომ ენმ-ს ადა მარშანიასა და ემზარ კვიციანის კენჭისყრიდან ჩამოშრება უნდოდა. რუსთავი 2-ზე ღამის კურიერში საუბრისას იგი ამბობს, რომ ოპოზიცია ამაზე "აქტიურად მუშაობდა".

საქართველოს პარლამენტმა საკონსტიტუციო ცვლილებები დაამტკიცა, რომლის მიხედვით, 2020 წლის არჩევნები ახალი სისტემით ჩატარდება. 120/30 სისტემა გულისხმობს მხოლოდ 30 მაჟორიტარს ახალი მოწვევის პარლამენტში, 120 დეპუტატი კი სიით საკანონმდებლო ორგანოში პარტიული სიით მოხვდება. კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები. მათი თქმით, შეთანხმების ნაწილი იყო გიორგი რურუას გათავისუფლებაც, რაც ხელისუფლებამ არ გააკეთა.

პარლამენტში კენჭისყრამდე მოძრაობა #სირცხვილიასა და შეცვალეს წევრებმა, ასევე, გიორგი რურუას მეგობრებმა აქცია გამართეს. ისინი 8 მარტის შეთანხმების ორივე ნაწილის ბოლომდე შესრულებას ითხოვდნენ.

8 მარტის შეთანხმება და საარჩევნო სისტემა

8 მარტის შეთანხმება საარჩევნო სისტემასთან დაკავშირებით საკონსტიტუციო ცვლილებებზე კონსენსუსს და მართმსაჯულების სისტემას ეხებოდა. ცვლილებების თანახმად, არსებული საარჩევნო სისტემა შეიცვალა და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება.

ოპოზიცია აცხადებს, რომ შეთანხმების ნაწილი იყო პოლიტპატიმრების გათავისუფლება, რასაც მმართველი გუნდი უარყოფდა. 2 პოლიტიკოსი გიგი უგულავა და ირაკლი ოქრუაშვილი პრეზიდენტმა შეიწყალა, მაგრამ პატიმრობაში რჩება მთავარი არხის მეწილე გიორგი რურუა, რის გამოც ოპოზიცია კენჭისყრაში არ მონაწილეობდა.

არსებულ ცვლილებებს სამი მოსმენით უკვე დაუჭირეს მხარი. ნაციონალურმა მოძრაობამ არც ერთ კენჭისყრაში არ მიიღო მონაწილეობა, რის მიზეზადაც რურუას პატიმრობა დაასახელა. პირველ მოსმენაში პროექტს მხარი დაუჭირა ევროპულმა საქართველომ, თუმცა რურუას მიზეზით მეორე და მესამე მოსმენაზე არ მივიდა.