VR ანუ ვირტუალური რეალობის ტექნოლოგია, ჯერ კიდევ ცდილობს მოერგოს გეიმინგი ინდუსტრიას. ვიდეო თამაშების მოყვარულები პრეტენზიული ხალხია, ამ სფეროში ცუდი პროდუქტის გაშვება სარისკოა, ამიტომ VR ტექნოლოგიაზე ხარისხზე ორიენტირებული, აუჩქარებელი მუშაობა მიდის.

სამაგიეროდ სხვა ინდუსტრიები და სფეროები უფრო თამამად ნერგავენ მას. მათ შორისაა სამედიცინო სფეროც.

ავსტრალიურმა კომპანია Medibank-მა ახალი პროგრამა Joy შექმნა, რომელიც საავადმყოფოში ან სახლში მწოლიარე პაციენტებს მარტოობას შეუმსუბუქებს.

Medibank-ის ოფიციალურ გვერდზე განთავსებული ვიდეო რგოლი ჯოის შესახებ მოგვითხრობს. მთავარი პერსონაჟი გოგონა ამბობს, რომ ავადმყოფ ოჯახის წევრებს, ნათესავებსა და მეგობრებს ხშირად ვნახულობთ, მაგრამ თუ წოლითი რეჟიმი დიდი ხნით არის დანიშნული, ხშირად შეიძლება ვერ მივიდეთ მათთან. ამიტომ, ჩვენი საყვარელი ადამიანებისთვის მარტოობის განცდის შესამსუბუქებლად შეგვიძლია ახალი VR მოწყობილობა გამოვიყენოთ, რომელიც პაციენტებს, ადგილიდან გაუსვლელად, ოთახის დატოვების საშუალებას მისცემს.

Joy ჯერ კარგად დახვეწილი პროგრამა არ არის. როდესაც ადამიანი ამ პროგრამაში შედის, ის მინდორში აღმოჩნდება, სადაც ცეცხლთან რამდენიმე ვირტუალური პერსონაჟი ზის და მას მასთან ურთიერთობა და ამ ვირტუალური პერსონაჟების მოყოლილი ამბების მოსმენა შეუძლია.

ამ გარემოს და სივრცეს პაციენტები ბავშვურს უწოდებენ, მაგრამ ამავდროულად ამბობენ, რომ კარგად ერთობიან.

მომავალში, ალბათ, კარგი იქნება თუ Joy-ს ინტერნეტით კომუნიკაციის საშუალება ექნება და პაციენტები რეალურ ადამიანებთან იურთიერთებენ VR მინდვრებსა თუ ქალაქებში.