მოხალისეობრივი საქმის კეთებით ადამიანები იძენენ მეგობრებსა და ახალ უნარებს, ვითარდებიან კარიერაში ან უბრალოდ, საერთო ინტერესების მქონე ხალხთან ერთად დროს ნაყოფიერად ატარებენ. ამ სტატიაში ახალგაზრდულ ორგანიზაციაზე, მოხალისეთა ჰაბზე და მათ მიღწევებზე მოგიყვებით.

მოხალისეთა ჰაბი 2019 წლის აგვისტოში შეიქმნა. მაშინ დამფუძნებლები ფიქრობდნენ, რომ ეს უნდა ყოფილიყო კომფორტული სივრცე, სადაც, თავისუფალ დროს, ერთად, კარგ საქმეებს გააკეთებდნენ. მოხალისეთა ჰაბის შექმნის ინსპირაცია დამფუძნებლების ეროპული და ამერიკული გამოცდილება იყო.

"ამერიკაში სწავლისას სავალდებულო მოხალისეობრივი საათები მქონდა. ამ დროის განმავლობაში მოხალისეობრივად ვაორგანიზებდი კონცერტებს მოხუცებისთვის, მარტოხელა დედებს ვეხმარებოდი, რომ ლექციებს დასწრებოდნენ და მათ შვილებს სამაგიდო თამაშებს ვეთამაშებოდი, ვმუშაობდი განსაკუთრებული საჭიროების მქონე პირებთან. პრაქტიკულ მოხალისეობამდე მქონდა ტრენინგები, შემდეგ იწყებოდა საოცარი თავგადასავლები. უამრავი მეგობარი და უნარ-ჩვევები შევიძინე, რაც კარიერაში ჩემი წარმატებების საფუძველი გახდა. თან ვამჩნევდი, რომ პროფესორები და სტუდენტები უფრო დიდ პატივს მცემდნენ და ბევრს უნდოდა ჩემთან მეგობრობა, რადგან ხედავდნენ, რომ ამდენი რამის კეთება შემიძლია", — ამბობს ნატალია ჭამიაშვილი მოხალისეთა ჰაბის დამფუძნებელი.

ორგანიზაციის აღმასრულებელი დირექტორი, ქეთევან ტატიკიანი, ორგანიზაციას მნიშვნელოვან მისიას აკისრებს საზოგადოების წინაშე: “მოხალისეთა ჰაბი არის ადგილი, რომელიც მუდმივად ცდილობს, საზოგადოებას სიახლეები შესთავაზოს. ჩემი მთავარი ხედვა ჰაბის გარშემო სწორედ სიახლეებსა და მუდმივ მოძრაობას უკავშირდება. მჯერა, რომ მოხალისეობის წახალისებით ჩვენ ხელს ვუწყობთ ახალგაზრდების გაძლიერებას, მათთვის სასარგებლო უნარების განვითარებასა და სანაცნობო წრის გაზრდას, რომელიც მათ სამომავლოდ აუცილებლად გამოადგებათ. ის მასშტაბები, რომლებიც ჩვენმა ორგანიზაციამ 10 თვის განმავლობაში მოიცვა ქვეყნის შიგნით და გარეთ დაუჯერებელია და განსაკუთრებულ ემოციებს ბადებს. ვამაყობ, რომ ჩვენ სამაგალითოები ვართ ბევრი უცხოელი პარტნიორისთვის, რომლებიც გაოცებულები არიან, როდესაც ჩვენს ხედვებს ეცნობიან".

მოხალისეთა ჰაბის პროექტების მენეჯერის, ქეთი არჯევანიძისათვის, მნიშვნელოვანია, რომ თავისი საქმიანობა სასარგებლო და საინტერესო იყოს:

"ბავშვობაში ყველა ვოცნებობთ, რომ მნიშვნელოვანი საქმე ვაკეთოთ ცხოვრებაში. რომ ჩვენი საქმიანობა ადამიანებისთვის სარგებლის მომტანი იყოს. მოხალისეთა ჰაბი ჩემთვის სწორედ ესაა - შესაძლებლობა, რაც შეიძლება საინტერესო და აზრიანი ცხოვრება მქონდეს".

ასე, რომ შეიქმნა სივრცე, სადაც ახალგაზრდებს, რომლებსაც აქვთ სხვადასხვა სფეროში საკუთარი თავის მოსინჯვის სურვილი, უტარდებათ ტრენინგები პროფესიონალების მიერ, შემდეგ კი, უკვე გაუმჯობესებული უნარ-ჩვევებით მოხალისეობენ ჰაბში, ან მის მეგობარ ორგანიზაციებში. ამასთან, გამოჩნდნენ კომპანიები, რომლებმაც საინტერესო პრიზები დააწესეს ყველაზე აქტიური მოხალისეებისთვის. მოხალისეთა ჰაბს საერთაშორისო პარტნიორებიც ჰყავს, რომლებიც ორგანიზაციის წევრებსა და მოხალისეებს დაფინანსებულ გაცვლით პროგრამებში რთავენ. მოხალისეების დიდმა უმრავლესობამ უკვე შეძლო დაგროვებული გამოცდილების შედეგად მოკლე ან გრძელვადიანი დასაქმების შესაძლებლობები მოეძიათ.

შექმნიდან რამდენიმე თვეში მოხალისეთა ჰაბში გაჩნდა ცალკე ინიციატივა — W4W. მისი მიზანი ქალების გაძლიერებაა. თავდაპირველად ეს ინიციატივა გულისხმობდა ერთი ღონისძიების ჩატარებას, რომელიც ევროკავშირის მხარდაჭერით, ახალგაზრდა ევროპელ ელჩებთან თანამშრომლობით ჩატარდა. ღონისძიებას 500-მდე ქალი დაესწრო.

„ამ ღონისძიებაზე საოცარი მუხტი იგრძნობოდა. პირველად ვნახე ერთ სივრცეში ამდენი მოტივირებული და ძლიერი ახალგაზრდა ქალი. ვიგრძენით, რომ გვქონდა ამ ქალების ნდობა, რომელიც აუცილებლად უნდა გაგვემართლებინა, ამიტომ გადავწყვიტეთ ამ მიმართულებით ჩვენი საქმიანობის გაგრძელება", — ამბობს ნატალია.

W4W არის აქტიური ფეისბუქის ჯგუფი, რომელიც თავდაპირველად ძალადობის მსხვერპლი ქალის დასახმარებლად შეიქმნა. დღეს აქ 11000 ქალზე მეტია გაწევრიანებული. ჯგუფში წევრები ერთმანეთს საკუთარ გამოცდილებას უზიარებენ სხვადასხვა საგანმანათლებო და გაცვლითი პროგრამების შესახებ. ჯგუფის მხარდამჭერია 4 საელჩო და 10-ზე მეტი საერთაშორისო ორგანიზაცია. W4W-ის პარტნიორია ისრაელის საელჩოც საქართველოში. როგორც ორგანიზაციის წარმომადგენლები გვიყვებიან, რამდენიმე დღის წინ ისრაელის ელჩიც ჩაერთო ჯგუფის ლაივში და პირადად ესაუბრა დაინტერესებულ პირებს ისრაელის მიერ დაფინანსებული პროგრამების და Mashav-ის შესახებ.

მოხალისეთა ჰაბში გვიყვებიან, რომ W4W უფრო მეტია, ვიდრე ფეისბუქის ჯგუფი. ამ ქსელის წევრებს ონლაინ თუ პირისპირ შეხვედრები უტარდებათ, აქ ქალები პოულობენ საუკეთესო მეგობებს და ძალიან სწრაფად ცვლიან საკუთარ ცხოვრებას უკეთესობისკენ. უკვე 8 თვის განმავლობაში ჯგუფის 600-ზე მეტი წევრი დასაქმდა ან ისარგებლა მისთვის საჭირო პროგრამით.