რესპუბლიკური პარტიის ერთ-ერთ ლიდერს, ხათუნა სამნიძის თქმით, ვერ მიიღო პასუხი კითხვაზე, რა კავშირშია საბოტაჟის მუხლით დაწყებულ გამოძიებასთან. მისი თქმით, ეს კითხვა მაგისტრი მოსამართლის თანდასწრებით დაკითხვისას დასვა. ამ თემაზე სამნიძემ მთავარი არხის ეთერში ისაუბრა.

"აქ გავიგე, დღეს გავიგე, რომ საქმე, რისი მოწმეც თურმე მე ვარ და მოწმის სტატუსით ვიყავი დაბარული, ეხება საბოტაჟის მუხლით აღძრულ საქმეს, იმ სიუჟეტის წინააღმდეგ, რომელიც გავიდა თქვენს [მთავარი არხის] ეთერში. ამას მოჰყვა ის, რომ მე ვარ თურმე რაღაცის მოწმე, რაც ვერ ამიხსნეს, ვიკითხე რა კავშირშიათქო, მაგრამ პასუხი ვერ მივიღე", — თქვა ხათუნა სამნიძემ.

პოლიტიკოსის თქმით, სახელმწიფოს სურს პრობლემა პირდაპირ დაუკავშიროს ოპოზიციას და ეს პროცესი გამოძიებას არ უკავშირდება. მისი თქმით, ხელისუფლება "სახელმწიფო მანქანის" ამუშავებით ცდილობს ზეწოლა მოახდინოს და დააშინოს ყველა, ვინც მათ საქმიანობაში ეჭვს შეიტანს, განსხვავებულ აზრს დააფიქსირებს.

სახელმწიფო უსაფრთხოების სამსახურში გამოკითხვაზე დაიბარეს მთავარი არხის სიუჟეტის რესპონდენტები, რომლებიც კოვიდსტატისტიკის გაყალბებაზე საუბრობდნენ. უწყების განმარტებით, ისინი საბოტაჟის მუხლით დაწყებული გამოძების ფარგლებში გამოიკითხებიან, რომელიც რამდენიმე თვის წინ კორონავირუსზე ცრუ შეტყობინებების დაგზავნის შემდეგ დაიწყო.

სიუჟეტი მთავარი არხის ეთერში 20 ივნისს გავიდა. რესპონდენტები მარნეულიდან ტელევიზიასთან საუბრისას აცხადებდნენ, რომ კონკრეტულ პირებს 10 000 ლარი შესთავაზეს იმის სანაცვლოდ, რომ ოჯახის წევრის გარდაცვალების მიზეზად კორონავირუსი დაესახელებინათ.

მომხდარზე გამოძიება საქართველოს სისხლის სამართლის კოდექსის 318-ე მუხლის 1-ლი ნაწილით მიმდინარეობს.

სახელმწიფო უსაფრთხოების სამსახურის მტკიცებით, საბოტაჟის საქმეზე გამოკითხული მთავარი არხის რესპონდენტები ამბობენ, რომ ტელეკომპანიამ მათი კომენტარები დაამონტაჟა. უწყებაში აცხადებენ, რომ მთავარმა არხმა აზერბაიჯანულენოვანი ინტერვიუები არასწორად თარგმნა და გაავრცელა ინფორმაცია, რომ ადგილობრივი ხელისუფლების წარმომადგენლები, გარდაცვალების მიზეზად კორონავირუსის დასახელების სანაცვლოდ, მოქალაქეებს 3 000-დან 10 000 ლარამდე სთავაზობენ.

პასუხად მთავარ არხში აზერბაიჯანულენოვანი ვერსია, ტიტრებით გაუშვეს.