ფინანასთა მინისტრის, ვანო მაჭავარიანის განცხადებით, ამ ეტაპისთვის ფრენების აღდგენის გადადება ჭკვიანური გადაწყვეტილება. როგორც მან ჟურნალისტებს განუმარტა, ტურისტების დიდი რაოდენობა არ შემოვა და ვირუსის გავრცელების რისკი კვლავ მაღალია.

ფინანსთა მინისტრმა განმარტა, რომ ტურიზმის შემოსავლების 80 პროცენტი მეზობელი ქვეყნებიდან სახმელეთო კვეთით შემოსული ტურისტებიდან მოდის. დარჩენილი ტურისტებიდან, ვინც საჰაერო გზით ჩამოდიოდა, ისევ მეზობელი ქვეყნებიდან იყვნენ, ხოლო ძალიან მცირე წილი იყო საჰაერო გზით შემოსული ევროპელი ტურისტების.

"თქვენ რომ მოდელი გააკეთოთ და ნახოთ,ფრენების გახსნი შემთხვევაში, რა რაოდენობა შეიძლება ჩამოვიდეს, ეს ზღვაში წვეთია ერთი თვის მაგალითზე და იმ სენტიმენტების გათვალისწინებით.

შემცირებული სენტიმენტების, მოგზაურობის ფონზე კიდევ უფრო დაბალი რაოდენობა ადამიანების შემოვა. ეპიდემიოლოგიური რისკი ჯერ კიდევ მოჰყვება მაღალი. ამას თუ შეწონით, იტყვით, რომ ერთი თვით კიდევ დალოდება გაცილებით მნიშვნელოვანია, ვიდრე ის, რომ ციფრებში გამოიყვანოთ. წინა წლის ივლისის ტურისტის 98 პროცენტი არანაირად და ვერანაირად ვერ აღდგება და იმისთვის რომ ვირუსი გავრცელდეს, 500 კაცი ეყოფა. რისკსა და ბენეფიტს რომ აწონი, თვითონ გეუბნება, რომ ამ ეტაპზე თავის შეკავება ყველაზე ჭკვიანური გადაწყვეტილებაა", — განაცხადა მაჭავარიანმა.

25 ივნისს სამოქალაქო ავიაციის სააგენტოს ინფორმაციით, საერთაშორისო რეგულარული საჰაერო მიმოსვლაზე შეზღუდვები 2020 წლის 31 ივლისის ჩათვლით გახანგრძლივდა და მიმოსვლა პირველ აგვისტომდე არ აღდგება. მათი თქმით, უკვე აცნობეს ავიაკომპანიებს, რომლებიც რეგულარულ რეისებს ახორციელებენ საქართველოს მიმართულებით.

გარდა ამისა, სააგენტო აცხადებს, რომ რეგულარული საჰაერო მიმოსვლის აღდგენამდე, გაგრძელდება მრავალჯერადი ჩარტერული რეისების რამდენიმე მიმართულებით. მათი თქმით, აღნიშნულ ავიარეისებთან დაკავშირებული ინფორმაცია ცნობილი გახდება ფრენის ნებართვების მინიჭებისთანავე.

ამასთან, Euronews წყაროზე დაყრდნობით იმ ქვეყნების სიას აქვეყნებს, რომელსაც ევროკავშირი პირველი ივლისიდან საზღვრებს უხსნის. მათ შორის მოხვდა საქართველოც.

როგორც გამოცემა აღნიშნავს, ევროკავშირის წარმომადგენლებს შორის დებატები სიასთან დაკავშირებით 25 ივნისს შეთანხმების გარეშე დასრულდა და განხილვას ხვალ, 26 ივნისს გააგრძელებენ.