მას შემდეგ, რაც თურქულმა ლირამ ამერიკულ დოლართან მიმართებით გაუფასურება დაიწყო, პრეზიდენტმა ერდოღანმა მოქალაქეებს შენახული დოლარის გაყიდვისკენ მოუწოდა. მისი განცხადების შემდეგ კი ლირა კიდევ უფრო გაუფასურდა და ახალი ანტირეკორდი დაამყარა – 1 დოლარის ღირებულება 3,55 ლირა გახდა.

Hurriyet Daily News-ის ინფორმაციით, ერდოღანმა 2 დეკემბერს მოსახლეობას მიმართა, გაყიდონ დოლარი და სანაცვლოდ ან ოქრო იყიდონ, ან ეროვნული ვალუტა. მისივე თქმით, ეს შეამცირებს მოთხოვნას დოლარზე და შესაბამისად, თურქეთს გაუადვილდება ეკონომიკური პრობლემის დაძლევა.

მან ასევე გააკრიტიკა თურქეთის ცენტრალური ბანკი მაღალი საპროცენტო განაკვეთების გამო და თქვა, რატომ უნდა იყოს თურქეთში კრედიტებზე 13–16 პროცენტი, როცა ის ევროპასა და ამერიკაში გაცილებით დაბალია. ერდოღანის თქმით, აუცილებელია პროცენტების დაკლება, რათა უფრო ადვილად მიიზიდონ ინვესტორები.

თურქეთის პრეზიდენტმა ბიზნესმენებსაც მოუწოდა, ყველა ტრანზაქცია ლირაში განახორციელონ და უარი თქვან დოლარზე.

თურქული ლირა იმ ერთეულ გამონაკლისებს შორისაა, რომელთა მიმართ ლარი მცირედით გამყარდა ბოლო პერიოდში, ამის მიზეზი კი სწორედ ლირას უფრო მკვეთრი გაუფასურებაა. მსოფლიოს დანარჩენი, იმ ვალუტების უმრავლესობასთან მიმართებით, რომელთანაც საქართველოს რაიმე სახის ეკონომიკური კავშირი აქვს, ლარი ბოლო პერიოდში პერმანენტულად უფასურდება.