ევროპული საქართველოს ერთ-ერთი ლიდერი, გიგი უგულავა ამბობს, რომ შესაძლოა, ოპოზიციამ გადაწყვიტოს საბურთალოს ოლქში მაჟორიტარად არა ერთიანი კანდიდატის დასახელება, არამედ, ყველა პარტიის მონაწილეობა და მეორე ტურში გასული ადამიანის მხარდაჭერა. ამის შესახებ უგულავამ მთავარი არხის ეთერში ისაუბრა.

საბურთალო იმ ორ ოლქს შორისაა, სადაც ოპოზიციას საერთო კანდიდატები არ დაუსახელებია და ამ დრომდე კონსულტაციებს გადის. გიგი უგულავას განმარტებით, ეს ოლქი "სპეციფიკურ შემთხვევად ყალიბდება" და ამიტომ არ არის გამორიცხული, რომ ყველა პარტიამ თავისი კანდიდატი დაასახელოს.

მისი თქმით, დანარჩენი 6 ოლქისგან განსხვავებით, აქ არსებული წინაპირობები არ ქმნის პირველივე ტურში მოგების შესაძლებლობას. ამ კუთხით მან ისაუბრა ალეკო ელისაშვილის სავარაუდო კანდიდატობაზე საბურთალოზე.

"შეიძლება მივიღოთ გადაწყვეტილება, რომ ყველას ჰყავდეს კანდიდატი და ვინც მეორე ტურში გავა, იმას დავუჭერთ მხარს. ოღონდ ამას ვამბობ სპეციფიკურად ამ რაიონზე, იმიტომ რომ ამ რაიონში არსებული ვითარება ამ წუთას ასეთია, რომ სამწუხაროდ, ბატონი ელისაშვილი გავიდა ამ ერთობიდან. მე ძალიან ვწუხვარ, რომ მისი საუბრის 2/3 ეძღვნება ოპოზიციის ლანძღვას და ნაკლებად ქართული ოცნებისას. მას უნდა ესმოდეს, რომ რაც არ უნდა ბევრი ილაპარაკოს ქართული ოცნების მავნებლობაზე, როგორც კი ოპოზიციის ლანძღვას დაიწყებს, ჰედლაინები და მედიის ინტერესი... იმიტომ, რომ ის ოპოზიციას წარმოადგენს. ამიტომ მე ვურჩევდი მას. არარაციონალურად და დათვურ სამსახურს უწევს ქართულ ოცნებას და იმედი მაქვს, რომ ეს შეგნებულად არ კეთდება. ზუსტად ამ ფაქტორების გათვალისწინებით, საბურთალოზე შეიძლება გვქონდეს განსხვავებული ვითარება", — თქვა უგულავამ.

მან ასევე თქვა, რომ ელისაშვილს თბილისში ორი მაჟორიტარის წარდგენა სურდა.

ცნობისთვის, ალეკო ელისაშვილს საბურთალოს ოლქში საკუთარი კანდიდატურა ოფიციალურად ჯერ არ დაუსახელებია, თუმცა სავარაუდოა, რომ კენჭს სწორედ იქ იყრის. მან იუსტიციის უმაღლესი საბჭოს უკვე ყოფილ არამოსამართლე წევრ ანა დოლიძესთან და დამოუკიდებელ დეპუტატ ლევან კობერიძესთან ერთად პოლიტიკური პლატფორმა შექმნეს.