ევროპული საქართველოს ერთ-ერთი ლიდერი, გიგი უგულავა აცხადებს, რომ ალეკო ელისაშვილს თბილისის 8 ოლქიდან მისი მოძრაობისთვის ორი ადგილი სურდა. ამის შესახებ მან მთავარი არხის ეთერში ისაუბრა.

"ჩვენ ღია ვიყავით მასთან თანამშრომლობისთვის, მათ შორის საბურთალოზე. მეტსაც გეტყვით, ისიც მოწადინებული იყო, უბრალოდ ორ ადგილს ითხოვდა და არ მესმის, დღეს პრინციპულ მიუღებლობაზე რომ საუბრობს თუნდაც ევროპული საქართველოს მიმართ, ორი ადგილით პრინციპულად მისაღები ვიქნებოდით როგორც ჩანს. ეს მის სინდისზე იყოს. მისი არჩევანი არაფრით განსხვავდება ჩვეულებრივი ვაჭრობისგან. ღმერთმა ხელი მოუმართოს, დანარჩენი მე მასზე საუბარს არ ვაპირებ, როგორც არ ვთვლი საჭიროდ ზედმეტად ოპოზიციის ერთმანეთში კინკლაობას. უბრალოდ, საწყენია, რომ საკუთარ ცხვირზე უფრო შორს ვერ იყურება ეს ადამიანი", — თქვა უგულავამ.

რაც შეეხება ლელოს, უგულავას განცხადებით, მიუხედავად იმისა, რომ ისინი ოპოზიციის სისტემურ შეთანხმებაში არ შედიან, არც მის წინააღმდეგ გამოდიან.

"ის კორექტული პარტნიორია, განსხვავებით ელისაშვილისგან, რომელიც პირდაპირ ამ ერთობას ურტყამს და ცდილობს ერთობის სიმულაცია შექმნას", — თქვა უგულავამ.

მან ასევე აღნიშნა, რომ შესაძლოა, ოპოზიციამ გადაწყვიტოს საბურთალოს ოლქში მაჟორიტარად არა ერთიანი კანდიდატის დასახელება, არამედ, ყველა პარტიის მონაწილეობა და მეორე ტურში გასული ადამიანის მხარდაჭერა.

ცნობისთვის, ალეკო ელისაშვილს საბურთალოს ოლქში საკუთარი კანდიდატურა ოფიციალურად ჯერ არ დაუსახელებია, თუმცა სავარაუდოა, რომ კენჭს სწორედ იქ იყრის. მან იუსტიციის უმაღლესი საბჭოს უკვე ყოფილ არამოსამართლე წევრ ანა დოლიძესთან და დამოუკიდებელ დეპუტატ ლევან კობერიძესთან ერთად პოლიტიკური პლატფორმა შექმნეს.