ეროვნული ბანკის ვიცე-პრეზიდენტმა არჩილ მესტვირიშვილმა ტვ პირველის ეთერში, ელენე კვანჭილაშვილთან ინტერვიუში გალარების პროგრამის პროცედურები განმარტა. მისი თქმით, ამ პროცესში, სხვა ქვეყნების გამოცდილებას გაითვალისწინებენ და ეროვნული ბანკი საკუთარი რეზერვებიდან პირდაპირ მიაწვდის ბანკს უცხოულ ვალუტას, იმ ფარგლებში, რა ფარგლებშიც მოხდება გალარება.

მისივე განმარტებით, ეს მოხდება "რეპო" ოპერაციით და შესაბამისად, მთლიანი რეზერვები არ შეიცვლება:

"გალარების პროცესი ზოგადად საშუალო ვადიან პერიოდში განმოიწვევს დოლარზე მოთხოვნის შემცირებას. შესაბამისად, სხვა ქვეყნების გამოცდილებითაც, ეს ვალუტა გამოჩნდება ბაზარზე და ერთი ორი წლის განმავლობაში ბაზრიდან უკან შევიძენთ, გამომდინარე იქიდან რა ტენდენცია იქნება სავალუტო ბაზარზე. მთლიანობაში, მთელი თანხა რასაც ეხება პოტენციურად გალარება, არის ერთი მილიარდი ლარი, ანუ 400 მილიონი დოლარი. ხაზს ვუსვამ, რომ ეს იქნება ნებაყოფლობითი, გამომდინარე იქედან, თუ როგორ უყურებს გაცვლითი კურსის რისკს და რა ტიპის შემოსავლები აქვს. საპროცენტო განაკვეთი იქნება საბაზროსთან მიახლოვებული და ეს დამოკიდებული იქნება კლიენტის გადახდისუნარიანობასთან".

არჩილ მესტვირიშვილი ასევე აცხადებს იმასაც, რომ ეროვნული ბანკი ხელს შეუწყობს კომერციულ ბანკებს, რათა ადექვატური რესურსი ჰქონდეთ, როგორც ლარის, ასევე, დოლარის.