შინაგან საქმეთა მინისტრის მოადგილის, ვლადიმერ ბორცვაძის თქმით, ამ ეტაპზე ფეხბურთელ გიორგი შაქარაშვილის გარდაცვალების საქმეზე ჯერ-ჯერობით სისხლის სამართლებრივი დევნა არ დაწყებულა. ამ თემაზე მან შსს-ს ბრიფინგზე ისაუბრა.

"ჯერ-ჯერობით სისხლის სამართლებრივი დევნა ამ საქმესთან დაკავშირებით დაწყებული არ არის. როგორც გითხარით, ტარდება შესაბამისი საგამოძიებო მოქმედებები. იმ შემთხვევაში, თუ სისხლის სამართლის საქმეში შეიკრიბება სათანადო მტკიცებულებები კონკრეტულ პირთა პასუხისმგებლობის კუთხით, რა თქმა უნდა, ჩვენი რეაქცია იქნება მყისიერი", — განაცხადა ვლადიმერ ბორცვაძემ.

მისი თქმით, ჯერ საქმეში გიორგი შაქარაშვილის მხრიდან კონფლიქტში მონაწილეობა არ იკვეთება. შინაგან საქმეთა მინისტრის მოადგილის თქმით, გიორგი შაქარაშვილის გარდაცვალების მიზეზს, ექსპერტიზა დაადგენს.

შინაგან საქმეთა სამინისტრომ თანამშრომლობისკენ მოუწოდა ყველას, ვინც ამ საქმესთან დაკავშირებით რაიმე სახის ინფორმაციას ფლობს.

22 ივნისს, 4-დღიანი ძებნის შემდეგ, მყვინთავებმა ფეხბურთელ გიორგი შაქარაშვილის ცხედარი წყალში იპოვეს. საგანგებო სიტუაციების მართვის სამსახურის ინფორმაციით, საძიებო სამუშაოებში ჩართული იყო 70 მეხანძრე-მაშველი, 7 ნავი და ორი სპეციალური კატერი, რომელიც ფსკერის სკანირებას ახორციელებდა.

ოჯახმა უწყებას ფეხბურთელ, გიორგი შაქარაშვილის დაკარგვის შესახებ 19 ივნისს, დაახლოებით 11 საათზე შეატყობინა.