7 დეკემბერს, 18:00 საათზე თბილისში პარლამენტის შენობის წინ, მოახლოებული ადამიანის უფლებების საერთაშორისო დაცვის დღესთან დაკავშირებით მანიფესტაცია გაიმართება სახელწოდებით - "კანონი კლავს!".

აქცია ნარკოტიკების მომხმარებელთა საქართველოს ქსელის (Genpud) ინიციატივით, თანადგომის და საქართველოს ზიანის შემცრიების ქსელის (GHRN) ორგანიზებით და მხარდაჭერით ჩატარდება.

აქციის ორგანიზატორები საქართველოში "მკვლელი ნარკოპოლიტიკის" შეცვლას მოითხოვენ:

"საქართველო გამოირჩევა სრულიად არაჰუმანური, არაცივილიზირებული და მკვლელი ნარკოპოლიტიკით, რაც ხელს უწყობს მოსახლეობის გაღარიბებას და ადამიანის ფუნდამენტური უფლებების დარღვევას, მათ შორის სიცოცხლის უფლების და ტანჯვის, არაადამიანური, ღირსების შემლახავი მოპყრობისგან დაცვის უფლების დარღვევას".

საქართველოში არსებული ნარკოპოლიტიკის შეცვლის მოთხოვნით თეთრი ხმაურის მოძრაობა 10 დეკემბერს აპირებს აქციის გამართვას.