მმართველი გუნდის დეპუტატის, ირაკლი კობახიძის განცხადებით, ოპოზიციის მიერ დასახელებული კანდიდატები მათ გამარჯვებას უადვილებს. მისი თქმით, ოპოზიციამ პირველ ტურში გამარჯვების საშუალება მათ ჯერ კიდევ მაშინ მისცა, როცა საერთო კანდიდატების დასახელება გადაწყვიტა.

"ესენი არიან აბსოლუტურად რეპუტაციაშელახული პოლიტიკოსები, რომლებსაც არ აქვთ საზოგაოდების მხარდაჭერა", — განაცხადა კობახიძემ.

მსგავსი რამ თქვა დღეს მისმა თანაგუნდელმა, მამუკა მდინარაძემაც. კობახიძისგან განსხვავებით, ის პიროვნულად კანდიდატებს არ შეხებია.

"ჩემთვის არანაირ მიზანს არსაერთო კანდიდატების დასახელებით წარმოადგენს ცინიზმი და არ შეიძლება, რომ უდიერად ან უპატივცემულოდ მოეპყრო შენს ყველაზე სუსტ კონკურენტს, თუმცა რატომღაც მგონია, რომ ჩვენი ოპონენტები, რადიკალური ოპოზიციიდან მათ შორის,ხელს გვიწყობენ უფრო მყარ გამარჯვებაში, როდესაც ასეთ გადაწყვეტილებებს ახმოვანებენ.

პიროვნულად არ მიიღოს არცერთმა, უფრო მეტად საუბარი მაქვს საერთო კანდიდატებზე, რა შემთხვევაშიც წარმატების საფუძველი ის იქნება, რომ პირველივე ტურში დასრულდება ყველაფერი", — განაცხადა მან.

ოპოზიციურმა ერთობამ თბილისში მაჟორიტარობის 6 კანდიდატი დაასახელა, რომელთა ვინაობა ლეიბორისტული პარტიის ლიდერმა, შალვა ნათელაშვილმა გაამხილა. ამ ეტაპზე დანარჩენი 2 ოლქის კანდიდატი უცნობია და პოლიტიკოსები აცხადებენ, რომ კონსულტაციები გრძელდება. რაც შეეხება 6 ოლქს, კანდიდატები ასე გადანაწილდა:

  • ნაძალადევი — შალვა ნათელაშვილი;
  • მთაწმინდა-კრწანისი — შალვა შავგულიძე;
  • ვაკე — ელენე ხოშტარია;
  • ისანი — გიორგი ვაშაძე;
  • სამგორი — ლევან ხაბეიშვილი
  • გლდანი — ნიკა მელია.

ევროპული საქართველოს ლიდერის, დავით ბაქრაძის თქმით, დარჩენილ ორ ოლქთან დაკავშირებით ევროპული საქართველოს პოზიციაა, რომ აქ ფართო საზოგადოებრივი კონსენსუსი იყოს და არაა აუცილებელი, პოლიტიკოსები იყვნენ.