შეუძლებელია ერთხელ მაინც არ შეხვედროდით ქართველი ქუჩის მხატვრის, გიორგი გაგოშიძის სტენსილს. ხელოვანი აქტუალურ მოვლენებს და სოციალურ საკითხებს თავისი შემოქმედებით პასუხობს.

ამ სტენსილების გადახედვით მარტივად გაგახსენდებათ, რა ხდებოდა საქართველოში რამდენიმე თვის ან თუნდაც ერთწლის წინ. გავიხსენოთ 10 სიტუაცია, როცა გაგოშამ უსამართლობას გონებამახვილური ნამუშევრით უპასუხა.

1. "ყველაფერი კარგადაა", 2018, თბილისი

ნახატით გაგოშამ საზოგადოებრივი მაუწყებლის მიერ გაშუქებული რეალობაა ასახა:

"აქ რაც ხატია ამას შვება ეს არხი. რეალობას გადააქცევს "ყველაფერი კარგადაა" ნიუსად, სწორედ ამ სიმულაციას გავუსვი ხაზი".

2. სარაჯიშვილი მწერალთა სახლს ტოვებს, 2019

მწერალთა სახლის გაუქმების შემდეგ, შესასვლელთან ახალი სტენსილი გაჩნდა. გაგოშას ნახატზე ცნობილი მეცენატი დავით სარაჯიშვილი ჩემოდნით გადის ეზოდან.

3. თვალახვეული ქართლის დედა და ომი მხატვართან

თბილისის ერთ-ერთ სიმბოლოს, ქართლის დედას გაგოშამ #სირცხვილიას საპროტესტო აქციების მიმართ სოლიდარობის ნიშნად თვალზე ხელი ააფარა.

სტენსილი მეორე დღესვე გადაღებეს.

მხატვარმა მის მიმართ გამოცხადებულ ომს ახალი შინაარსით უპასუხა: ამჯერად სახეგადაშლილ ქართლის დედას სპეცრაზმელი სახეში იარაღს უმიზნებდა, გარშემო კი რეზინის ტყვიები ეყარა.

ნამუშევარი მეორე დღესვე წაშალეს და ამ დროისთვის იქ არც ძველი, არც ახალი სტენსილების კვალი აღარაა.

4. ომიდან 11 წლის შემდეგ, გორი, 2019

გორში იმ კედელზე, რომელსაც 11 წლის წინ, აგვისტოს ომის დროს ტყვია მოხვდა, გაგოშამ სტენსილი დახატა.

5. ოდეს ტურფა გაიაფდეს, აღარა ღირს არცა ჩირად, 2019

ლარის გაუფასურებასთან დაკავშირებული სტენსილი რუსთავში გასული წლის ზაფხულში გამოჩნდა. ნახატზე ჩანს 50 და 100-ლარიანი კუპიურები, რომელზეც შოთა რუსთაველი თამარ მეფეს ამშვიდებს.

6. #SpendYourSummerInGeorgia, 2019

გასული წლის აგვისტოს მიწურულს ბათუმში ახალი სტენსილი გამოჩნდა. მისი საშუალებით გაგოშა ონლაინ კამპანია #SpendYourSummerInGeorgia-ს გამოეხმაურა, რომელიც მას შემდეგ დაიწყო, რაც პუტინმა რუსულ ავიაკომპანიებს საქართველოში ფრენა აუკრძალა.

სტენსილზე ქართულ სუფრასთან შემომსხდარ მსოფლიო ღირსშესანიშნაობებს ვხედავთ. სუფრის თავში კრემლი ზის, რომელსაც სძინავს, მთაწმინდის ანძა კი ეიფელისა და პიზის კოშკთან, თავისუფლების ქანდაკებასთან, მოაის ქვის ქანდაკებებთან და სხვა ღირსშესანიშნაობებთან ერთად მშვიდობის სადღეგრძელოს სვამს.

7. ფერადი ფანქრებით შეიარაღებული კუპიდონი, 2019

And Then We Danced-ის გამოსვლას საქართველოში მოწინააღმდეგეები გამოუჩნდნენ. საზოგადოების გარკვეულ ნაწილს ეშინოდა ფერადი კუპიდონების. ისინი ამბობდნენ, რომ ფილმის ყურების შემდეგ შეიძლება, სექსუალური ორიენტაცია შეიცვალო.

სწორედ ამ ჰომოფობიურ დამოკიდებულებას ეხებოდა თბილისში ლგბტ თემაზე შექმნილი სტენსილიც. ნახატზე გამოსახულია კუპიდონი, რომელსაც ისრების ნაცვლად, ფერადი ფანქრები უჭირავს. მას შეიარაღებული ჯგუფი უპირისპირდება. ისინი შემტევ და თან თავდაცვით პოზიციაში დგანან, ფარებს ამოფარებულები.

8. "განწყობა", 2019

ნახატი ეხება სამოქალაქო პროტესტს. სტენსილზე გამოსახულია გოგო, რომელიც დასარბევად გამიზნული წყლის ჭავლით იღებს ცივ შხაპს, რაც "გამოფხიზლების ნიშანია".

9. ოჯახის სიწმინდის დღე და გაჭრილი ცისარტყელა, 2020

17 მაისს, გაგოშამ ჰომოფობია ახალი სტენსილით გააპროტესტა. მან ლისის ტბის მიმდებარედ დახატა ცისარტყელა, რომელსაც ოჯახი ხერხით აზიანებს. ფოტოები მხატვარმა თავად გაავრცელა წარწერით: "ოჯახის სიწმინდის დღეს გილოცავთ ქართველებო".

10. ტყის კოდექსი, 2020

გაგოშას ნახატში, რომელიც თბილისის ერთ-ერთი მიწისქვეშა გადასასვლელთანაა, სასულიერო პირი ტყეში ხეს ნიშნავს, საიდანაც ფრინველები გასაფრენად ემზადებიან და ბუდეს ტოვებენ. სტენსილით მან პარლამენტის მიერ დაჩქარებული წესით მიღებული ტყის კოდექსი გააპროტესტა.

22 მაისს საქართველოს პარლამენტმა დაამტკიცა ტყის კოდექსი, რომელიც საპატრიარქოს საქართველოში არსებული ყველა ეკლესია-მონასტრის მიმდებარე ტყის ფართობის საკუთრებაში გადაცემას უშვებს — არაუმეტეს 20 ჰექტრისა თითოეულის შემთხვევაში.

ტელეკომპანია მთავარის გადაცემაში შენი დილა გაგოშამ საკუთარ შემოქმედებაზე ისაუბრა.