საგანგებო სიტუაციების მართვის მთავარი სამსახურის უფროსის, ოთარ კერესელიძის თქმით, გუშინ, 15 ივნისს ვარკეთილის ბაზრობაზე გაჩენილი ხანძრისას, დაახლოებით, 4 000 კვადრატული მეტრი ფართობი დაიწვა. ამ თემაზე მან კომენტარი რუსთავი 2-თან გააკეთა.

"ამ დროისთვის ხანძარი არის სრულად ლიკვიდირებული, დამწვარია დაახლოებით, 4 000 კვადრატამდე სასაწყობე ჯიხურები, ადგილზე უსაფრთხოების მიზნით ჩერდება კიდევ 3 სახანძრო ავტოცისტერნა, მთელი ღამის განმავლობაში მეხანძრე-მაშველებს მოუწიათ ადგილზე მუშაობა", — თქვა ოთარ კერესელიძემ.

მისი ინფორმაციით, სავარაუდოდ, ცეცხლი შენობის შუა ნაწილში გაჩნდა სადაც მარტივად აალებადი ნივთები ინახებოდა. ხანძრის გამომწვევი მიზეზები ჯერ უცნობია და ადგილზე მუშაობას სპეციალური სამსახურები აგრძელებენ.

შინაგან საქმეთა სამინისტროს ინფორმაციით, გამოძიება საქართველოს სისხლის სამართლის კოდექსის 187-ე მუხლის მე-2 ნაწილით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს.