ადამიანის უფლებათა დაცვის კომიტეტის თავმჯდომარის, სოფო კილაძის თქმით, ქართულ ოცნებას რეიტინგი გაზრდილი აქვს და თეორიული შანსიც არ არსებობს, რომ პარტიას ოქტომბერში არჩევნების ჩატარების ეშინოდეს. მისი თქმით, ქართული ოცნების მიზანია, რომ არჩევნები ოქტომბერში ჩატარდეს და ამისთვის ყველაფერს გააკეთებენ.

"ქართული ოცნების ხელისუფლებამ იმდენად კარგად იმუშავა პანდემიის პირობებში და იმდენად გაიზარდა კიდევ უფრო მეტად საზოგადოების ნდობა ქართული ოცნების გუნდის მიმართ, რადგან დაინახეს ადამიანებმა, რომ ხელისუფლება ამ კუთხით ძალიან ეფექტიანი, რა თქმა უნდა, ჩვენ ამ გუნდით, ამ რეიტინგით, ნამდვილად არ გვეშინია ოქტომბერში არჩევნების ჩატარება. ამიტომ თეორიული შანსიც არ არის, რომ ქართული ოცნების ინტერესში შეიძლება შედიოდეს არჩევნების გადაწევა", — განაცხადა კილაძემ.

ქართული ოცნების აღმასრულებელმა მდივანმა, ირაკლი კობახიძემ თქვა, რომ თუ COVID-19-ის მე-2 ტალღა ოქტომბრამდე იქნება, არჩევნები დეკემბრისთვის გადაიწევს. კობახიძე ვარაუდობს, რომ თუ კორონავირუსის მეორე ტალღა დაემთხვევა არჩევნებამდე პერიოდს [31 ოქტომბრამდეა], თეორიულად, არჩევნების თარიღის გადაწევა შესაძლებელია. მანვე აღნიშნა, რომ ეს იმ შემთხვევაში მოხდება, თუკი მთავრობა ოქტომბერში ისევ საგანგებო მდგომარეობას გამოაცხადებს. კანონით კი, არჩევნები საგანგებო მდგომარეობის გაუქმებიდან არაუადრეს 45 დღისა და არაუგვიანეს 60 დღისა უნდა ჩატარდეს.