ცენტრალური სადაზვერვო სააგენტოს (CIA) დირექტორმა, ჯონ ბრენანმა, აშშ-ს არჩეული პრეზიდენტი, დონალდ ტრამპი გააფრთხილა, რომ ირანთან ბირთვული პროგრამის შეჩერებაზე მიღწეული შეთანხმების ჩაშლა "კატასტროფული" და "ძალიან უგუნური საქციელი" იქნება.

BBC-სთან ინტერვიუში, ჯონ ბრენანმა დონალდ ტრამპს ასევე ურჩია, რომ იყოს წინდახედული რუსეთთან დაკავშირებით გაკეთებულ განცხადებებში, რადგან ბრენანის აზრით, სწორედ რუსეთს მიუძღვის დიდი წვლილი სირიაში მიმდინარე მოვლენებში.

დონალდ ტრამპმა საარჩევნო კამპანიისას განაცხადა, რომ ის ჩაშლიდა ირანთან მიღწეულ შეთანხმებას ბირთვული პროგრამის შეჩერებაზე, რასაც აშშ-ირანს შორის გაყინული მრავალწლიანი ურთიერთობების შედარებით დათბობა და ემბარგოს მოხსნა მოჰყვა. ტრამპმა ასევე დააანონსა, რომ ის რუსეთთან მჭიდრო თანამშრომლობას გეგმავდა.

CIA-ს დირექტორის თქმით, აშშ-ს ახალმა ადმინისტრაციამ ფრთხილად, წინდახედულად უნდა იმოქმედოს ისეთ საკითხებთან დაკავშირებით, როგორიცაა რუსეთთან და ირანთან ურთიერთობა, ასევე ტერორიზმთან ბრძოლა თავად ცენტრალური სადაზვერვო სააგენტოს ფარული საქმიანობა. დონალდ ტრამპი წინასაარჩევნო კამპანიისას აცხადებდა, რომ CIA-მ უნდა აღადგინოს დაკითხვის არაადამიანური მეთოდები, თუ ისინი ეფექტიანი იქნება (ცნობილი ფაქტია, რომ აშშ-ს მთავრობა ტერორიზმში ბრალდებულებს, მათგან მნიშვნელოვანი ინფორმაციის მიღების მიზნით, აწამებდა). CIA-ის ამჟამინდელი დირექტორისთვის მსგავსი მეთოდების გამოყენება შეცდომაა.

ჯონ ბრენანი აშშ-ში ერთ-ერთ ყველაზე მნიშვნელოვან პოსტზე ოთხწლიან მუშაობას 2017 წლის იანვარში დაასრულებს.