პროკურატურის განცხადებით, სასამართლომ დამამცირებელ და არაადამიანურ მოპყრობაში ბრალდებული ციხის ყოფილი თანამშრომლები დამნაშავედ სცნო.

საქმე ეხება სასჯელაღსრულების, პრობაციისა და იურიდიულ საკითხთა სამინისტროს სასჯელაღსრულების დეპარტამენტის #4 დაწესებულების სამართლებრივი რეჟიმის განყოფილების ყოფილი ინსპექტორის, კობა ანთიასა და ამავე დაწესებულების სამართლებრივი რეჟიმის განყოფილების ყოფილი მთავარი ინსპექტორის, ონისე ლაგვილავას საქმეებს.

კობა ანთიას და ონისე ლაგვილავას სასჯელის სახედ და ზომად განესაზღვრათ 4 წლითა და 8 თვით თავისუფლების აღკვეთა. ხოლო, ამნისტიის აქტის გამოყენებით შეუმცირდათ დანიშნული სასჯელი და საბოლოოდ, სასჯელის სახით განესაზღვრათ 3 წლით და 6 თვით თავისუფლების აღკვეთა, ასევე 2 წლისა და 3 თვით ჩამოერთვათ თანამდებობის დაკავების უფლება.

საქმეზე გამოძიება მიმდინარეობდა სისხლის სამართლის კოდექსის 1443 მუხლის მე-2 ნაწილის ა, ბ, ე და ზ ქვეპუნქტებით, რაც გულისხმობს დამამცირებელ და არაადამიანურ მოპყრობას მოხელის ან მასთან გათანაბრებული პირის მიერ, სამსახურებრივი მდგომარეობის გამოყენებით, ჯგუფურად, დაკავებული ან სხვაგვარად თავისუფლება შეზღუდული პირების მიმართ.

პროკურატურის ვერსიით, 2009-2012 წლებში, სასჯელაღსრულების დეპარტამენტის ზუგდიდის #4 დაწესებულებაში მუშაობის პერიოდში, კობა ანთია და ონისე ლაგვილავა სისტემატიურად ამცირებდნენ პატიმრებს, არაადამიანურ, ღირსებისა და პატივის შემლახავ მდგომარეობაში აყენებდნენ მათ, დაწესებულებაში შეყვანისთანავე აშიშვლებდნენ პატიმრებს, აყენებდნენ სიტყვიერი და ფიზიკური შეურაცხყოფას, სცემდნენ უმოწყალოდ დაშინებისა და უსიტყვო მორჩილების მიზნით, ასევე, შანტაჟის გზით იყოლიებდნენ თანამშრომლობაზე.