პარლამენტის დამოუკიდებელი დეპუტატის, ეკა ბესელიას თქმით, დეპუტატ ირაკლი კობახიძის ადგილას 20 ივნისს დაგეგმილ აქციას ირონიულად არ შეხედავდა. ამ თემაზე მან კომენტარი მთავარ არხთან გააკეთა.

"იმდენად არ განვიხილავ სერიოზულად, 2-ჯერ 200 ან 3-ჯერ 200 რომ აღმოჩნდეს, შემდეგ ამ თავების გადათვლას რას დაარქმევს კობახიძე. 20 ივნისს სერიოზულად რომ ვისაუბროთ არ შევხედავდი მის ადგილზე ესე ირონიულად, იმიტომ რომ ეს არის ის დღე, როცა პარლამენტის თავმჯდომარის უპასუხისმგებლო ქმედებამ, პარლამენტი ცეცხლის ალში გაახვია", — ამბობს ეკა ბესელია.

მისი თქმით, ხელისუფლება 20 ივნისის მოვლენებზე პასუხისმგებლობას 1 წლის თავზე უნდა იაზრებდეს.

დეპუტატმა ირაკლი კობახიძემ ფორმულასთან საუბრისას აღნიშნა, რომ კანონი პოლიტიკურ შეკრებებს არ კრძალავს და დისტანციის დაცვის გათვალისწინებით 20 ივნისს შეკრებილი 200 ნაციონალის დათვლა უფრო მარტივი იქნება.

მოძრაობა სირცხვილია 20 ივნისიდან 1 წლის თავზე რუსთაველზე აქციის გამართვას გეგმავს. ორგანიზატორების განცხადებით, აქცია წესებისა და რეკომენდაციების დაცვით გაიმართება.

მათი თქმით, ხელისუფლების ქმედებები 1 წლის თავზეც სირცხვილია. მათივე განცხადებით, ხელისუფლებამ საკუთარ შეცდომაზე სწავლის ნაცვლად, გამოცხადებული ომი კიდევ უფრო გაამწვავა და თავისუფალ აზრს დაუპირისპირა როგორც ადმინისტრაციული რესურსი, ასევე მის მიერ მართული მედია და ასეულობით ყალბი ანგარიში სოციალურ ქსელში.

2019 წლის 20 ივნისს აქცია მას შემდეგ დაიწყო, რაც რუსეთის დუმის დეპუტატი საქართველოს პარლამენტის თავმჯდომარის სავარძელში დაჯდა. ხალხმრავალი აქცია პარლამენტის თავმჯდომარის გადადგომის მოთხოვნით გაგრძელდა. ირაკლი კობახიძე მხოლოდ მომდევნო დღეს გადადგა, მანამდე სპეცრაზმმა აქციაზე შეკრებილები ცრემლსადენი გაზისა და რეზინის ტყვიების გამოყენებით დაშალა. რამდენიმე მოქალაქემ დაკარგა თვალი. მთავრობა ამტკიცებს, რომ შეკრებილები პარლამენტის შტურმით აღებას აპირებდნენ და მათ წინააღმდეგ გამოძიებას აწარმოებს.