ნაციონალური მოძრაობის დეპუტატის, რომან გოცირიძის თქმით, განცხადება იმის შესახებ, რომ 20 ივნისს აქციაზე შეკრებილი მოქალაქეების თავებს დაითვლიან, შეიძლება მხოლოდ უთავო ადამინმა გააკეთოს.

"განცხადება იმის თაობაზე, რომ თავებს დაითვლიან 20 ივნისს და ასე შემდეგ, ეს შეიძლება გააკეთოს მხოლოდ უთავო ადამიანმა, 20 ივნისის ხსენება მათთვის არის შემახსენებელი იმ ძალადობისა და უსამართლობისა, რომელსაც სჩადიოდნენ მთელი ამ 8 წლის განმავლობაში, ამიტომ უფრთხიან", — თქვა რომან გოცირიძე.

რომან გოცირიძის თქმით, 20 ივნისს აქციაზე ერთი მოქალაქეც რომ მივიდეს და გავრილოვის სურათი დაიჭიროს, საქართველოს ხელისუფლების სახე იქნება.

დეპუტატმა ირაკლი კობახიძემ ფორმულასთან საუბრისას აღნიშნა, რომ კანონი პოლიტიკურ შეკრებებს არ კრძალავს და დისტანციის დაცვის გათვალისწინებით 20 ივნისს შეკრებილი 200 ნაციონალის დათვლა უფრო მარტივი იქნება.

მოძრაობა სირცხვილია 20 ივნისიდან 1 წლის თავზე რუსთაველზე აქციის გამართვას გეგმავს. ორგანიზატორების განცხადებით, აქცია წესებისა და რეკომენდაციების დაცვით გაიმართება.

მათი თქმით, ხელისუფლების ქმედებები 1 წლის თავზეც სირცხვილია. მათივე განცხადებით, ხელისუფლებამ საკუთარ შეცდომაზე სწავლის ნაცვლად, გამოცხადებული ომი კიდევ უფრო გაამწვავა და თავისუფალ აზრს დაუპირისპირა როგორც ადმინისტრაციული რესურსი, ასევე მის მიერ მართული მედია და ასეულობით ყალბი ანგარიში სოციალურ ქსელში.

2019 წლის 20 ივნისს აქცია მას შემდეგ დაიწყო, რაც რუსეთის დუმის დეპუტატი საქართველოს პარლამენტის თავმჯდომარის სავარძელში დაჯდა. ხალხმრავალი აქცია პარლამენტის თავმჯდომარის გადადგომის მოთხოვნით გაგრძელდა. ირაკლი კობახიძე მხოლოდ მომდევნო დღეს გადადგა, მანამდე სპეცრაზმმა აქციაზე შეკრებილები ცრემლსადენი გაზისა და რეზინის ტყვიების გამოყენებით დაშალა. რამდენიმე მოქალაქემ დაკარგა თვალი. მთავრობა ამტკიცებს, რომ შეკრებილები პარლამენტის შტურმით აღებას აპირებდნენ და მათ წინააღმდეგ გამოძიებას აწარმოებს.