თბილისის მერის, კახა კალაძის წინააღმდეგ პროკურატურაში სარჩელი შეიტანეს. აქტივისტები ვარკეთილის სკვერში მომხდარი დაპირისპირების გამო კალაძეს "ხულიგან მერს" უწოდებენ. მათი თქმით, განცხადება პოლიციაშიც დაწერეს, თუმცა არ აქვთ მოლოდინი, რომ უწყებებს შესაბამისი რეაგირება ექნებათ.

"მოგატყუებთ რომ გითხრათ, ვინმე გამოძიებას დაიწყებს და დასჯის კახა კალაძეს-თქო, მაგრამ ამ ქვეყანაში უკე არსებობს პრეცენდენტი, როდესაც ქართული ოცნების დეპუტატს გაურღვიეს პიჯაკი და ამის გამო, ახალგაზრდები სამ თვეზე მეტი ხანი იყვნენ წინასწარი დაკავების იზოლატორში და 4-დან 7 წლამდე პატიმრობა ემუქრებოდათ. თავადვე შექმნეს პრეცენდენტი და ახლა იქნება ტესტი, რამდენად გამოაჩენენ სახეს ბოლომდე", — განაცხადაქ ერთ-ერთმა აქტივისტმა.

5 ივნიის ვარკეთილში კახა კალაძესა და აქტივისტებს შორის დაპირისპირება მოხდა. მერი ვარკეთილში სკვერის გახსნაზე იყო მისული. ადგილზე ლაშა ჩხარტიშვილი და რამდენიმე აქტივისტი მივიდა.

მთავარი არხის მიერ გავრცელებულ კადრებში ჩანს, რომ თავდაპირველად აქტივისტმა მერს პროექტებთან დაკავშირებით რამდენიმე კითხვა დაუსვა, დაპირისპირება კი მას შემდეგ მოხდა, რაც ადგილიდან აქტივისტების განრიდება სცადეს. როგორც ადგილზე ერთ-ერთი პირი ყვება, დაპირისპირების დროს მას ხელი ჰკრეს და მაისური დაუხიეს.

თბილისის მერიის პრესსამსახურში On.ge-ს განუცხადეს, რომ ფიზიკურ და სიტყვიერ დაპირისპირებას ადგილი არ ჰქონია. კალაძემ მედიასთან საუბრისას მასსა და აქტივისტებს შორის რაიმე ტიპის ძალადობა უარყო. მისი თქმით, თუ შინაგან საქმეთა სამინისტროს საჭიროდ ჩათვლის გამოძიება უნდა დაიწყოს, თუმცა ადგილზე რამდენიმე ადამიანი მხოლოდ პროვოკაციის მოწყობას ცდილობდა. კალაძემ აღნიშნა, რომ აქტივისტებს სურდათ არეულობა შეეტანათ და სკვერის გახსნის ღონისძიება ჩაეშალათ, რაც არ გამოუვიდათ.