ბრაზილიის პრეზიდენტი, ჟაირ ბოლსონარუ იმუქრება, რომ ბრაზილია მსოფლიო ჯანდაცვის ორგანიზაციას (WHO-ს) დატოვებს. ამის შესახებ ინფორმაციას Reauters ავრცელებს. პრეზიდენტმა განცხადება პარასკევს CNN-ის ეთერში გააკეთა და ორგანიზაცია "პარტიზანულ პოლიტიკაში" დაადანაშაულა.

პრეზიდენტმა აღნიშნა, რომ პრეპარატი პლაქვენილი, რომელიც დროებით WHO-მ კორონავირუსის მკურნალობის პროტოკოლიდან ამოიღო, ვირუსთან გამკლავებაში დაეხმარებათ.

ჯანდაცვის მსოფლიო ორგანიზაციამ სოლიდარობის კვლევაში პლაქვენილი დააბრუნა, რადგან ჟურნალ Lancet-მა გაიწვია ის სტატია, რომელშიც COVID-19-ის პაციენტების მკურნალობის დროს პლაქვენილის სერიოზულ გვერდით მოვლენებზე იყო საუბარი.

სტატიაში მოყვანილი კვლევის გამო 25 მაისს ჯანდაცვის მსოფლიო ორგანიზაციამ მიიღო გადაწყვეტილება სოლიდარობის საერთაშორისო კვლევიდან პრეპარატი ამოიღო. ჯანმომ 3 ივნისს პრეპარატი მას შემდეგ დააბრუნა, რაც Lancet-ში კვლევასთან დაკავშირებით კითხვები გაჩნდა და სტატია გაიწვია.

ბრაზილიაში კორონავირუსით გარდაცვლილთა რაოდენობამ 35 000-ს მიაღწია, დადასტურებული შემთხვევები კი 645 771 გახდა. ქვეყანაში ვირუსის გავრცელება იზრდება, თუმცა მიუხედავად ამისა, პრეზიდენტი ეკონომიკის გახსნას გეგმავს.

ხუთშაბათს, ბრაზილიამ იტალიას გადააჭარბა COVID-19-ით დაღუპული ადამიანების საერთო რაოდენობის მიხედვით.