თბილისის მერის, კახი კალაძის თქმით, ვარკეთილში მომხდარი დაპირისპირების დროს, სავარაუდოდ, აქციის მონაწილემ მაისური თავად შემოიხია. კალაძემ მედიას აჩვენა ზედა, რომელსაც მისი თქმით, ამ პიროვნებას და მთავარ არხს საჩუქრად გადასცემს. მაისურზე დაპრინტულ სურათში აქტივისტი მიხეილ სააკაშვილთან ერთადაა გამოსახული.

"სავარაუდოდ, მან შემოიხია მაისური, იმიტომ, რომ არ გამოვიდა პროვოკაცია და მინდა საჩუქრად გადავცე ამ პიროვნებას მაისური, რომელიც გამოადგება, საკმაოდ საინტერესოა ორი გვაქვს ასეთი, ერთს მთავარ არხს გადავცემთ", — თქვა კახა კალაძემ.

კალაძემ მედიასთან საუბრისას კიდევ ერთხელ უარყო გუშინ, 5 ივნისის ვარკეთილში მას და აქტივისტებს შორის რაიმე ტიპის ძალადობა. მისი თქმით, თუ შინაგან საქმეთა სამინისტროს საჭიროდ ჩათვლის გამოძიება უნდა დაიწყოს, თუმცა ადგილზე რამდენიმე ადამიანი მხოლოდ პროვოკაციის მოწყობას ცდილობდა. კალაძემ აღნიშნა, რომ აქტივისტებს სურდათ არეულობა შეეტანათ და სკვერის გახსნის ღონისძიება ჩაეშალათ, რაც არ გამოუვიდათ.

ვარკეთილში კახა კალაძესა და აქტივისტებს შორის დაპირისპირება მოხდა. მერი ვარკეთილში სკვერის გახსნაზე იყო მისული. ადგილზე ლაშა ჩხარტიშვილი და რამდენიმე აქტივისტი მივიდა.

მთავარი არხის მიერ გავრცელებულ კადრებში ჩანს, რომ თავდაპირველად აქტივისტმა მერს პროექტებთან დაკავშირებით რამდენიმე კითხვა დაუსვა, დაპირისპირება კი მას შემდეგ მოხდა, რაც ადგილიდან აქტივისტების განრიდება სცადეს.

როგორც ადგილზე ერთ-ერთი პირი ყვება, დაპირისპირების დროს მას ხელი ჰკრეს და მაისური დაუხიეს.

თბილისის მერიის პრესსამსახურში On.ge-ს განუცხადეს, რომ ფიზიკურ და სიტყვიერ დაპირისპირებას ადგილი არ ჰქონია. დაპირისპირების შემდეგ კახა კალაძემ ჟურნალისტებს უთხრა, რომ ნაციონალური მოძრაობის წევრებმა პროვოკაცია სცადეს.