ნაციონალური მოძრაობის წევრი, თინა ბოკუჩავა ამბობს, რომ პრემიერმინისტრი გიორგი გახარია კორუფციას "ქართულ-ჯიგრულ პონტად" ახასიათებს და ამით კორუფციას ახალისებს. გარდა ამისა, ბოკუჩავამ "უტიფრობა" უწოდა პარლამენტში მისვლის "დამადლება".

"ძალიან მაინტერესებს ივანიშვილთან რომ ადიხართ დავალებების მისაღებად, მასაც თუ ამადლით იქ მისვლას, ან თუ იგივე ლექსიკით ესაუბრებით ივანიშვილს, რა ლექსიკითაც გვესაუბრებით ჩვენ საპარლამენტო ტრიბუნიდან, როდესაც "ქართულ-ჯიგრულ პონტზე" საუბრობთ და ასე ახასიათებთ კორუფციას. აი, ამას ახალისებთ თქვენ ბატონო გიორგი, როდესაც დგახართ საპარლამენტო ტრიბუნაზე და იმ ტერმინოლოგიას იყენებთ, რომელსაც იყენებთ. სინამდვილეში არაფერი ქართული კორუფციაში არაა. კორუფცია რუსული და საბჭოური ფენომენია, და მესმის, რომ თქვენთვის რომ ძალიან მშობლიური ის კულტურა და ის გაგება ან "პანაწიე", თქვენი მშობლიური ენით რომ ვთქვათ, მაგრამ ქართული არაფერია კორუფციაში", — განაცხადა ბოკუჩავამ.

პრემიერმინისტრი პარლამენტში დღეს ნაციონალური მოძრაობისა და ევროპული საქართველოს კითხვებზე საპასუხოდ მივიდა. 27 მაისს პრემიერი ასევე იყო პარლამენტში, თუმცა მაშინ კორონავირუსთან დაკავშირებული ანგარიში წარადგინა. პრემიერმა ხელისუფლებაში სისტემური კორუფცია უარყო და თქვა "შეიძლება ვიღაცამ ვიღაცას ქართულ ჯიგრულ პონტში რამე, მაგრამ რა კორუფცია".