პრემიერმინისტრის, გიორგი გახარიას თქმით, 1 800 დევნილი ოჯახი ბინას 3 წლით ადრე მიიღებს. ამ თემაზე მან დეველოპერული სექტორის მხარდაჭერის პრეზენტაციაზე ისაუბრა, რომელიც მთავრობის ანტიკრიზისული გეგმის ნაწილია.

"მთავრობა მიმართავს 150 მილიონ ლარს წლის ბოლომდე იმისთვის, რომ დააკონტრაქტოს დევნილებისთვის დამატებითი, 1 800 ოჯახისთვის, 3-ჯერ მეტი მშენებლობა. რაც ნიშნავს იმას, რომ ჩვენი დევნილები, 1 800 ოჯახი, დაახლოებით, 6 000 ადამიანი 3 წლით ადრე მიიღებს ბინას", — თქვა გიორგი გახარიამ.

პრემიერმა აღნიშნა, რომ მთავრობის ანტიკრიზისულმა გეგმამ ბევრი სოციალური ჯგუფი მოიცვა და ხშირად იყო კითხვები დევნილებზე. მისი თქმით, ამ "ჩავარდნას აკომპენსირებენ" და ეს სამშენებლო კომპანიებისთვისაც პირდაპირი დახმარება იქნება.