პრემიერი გიორგი გახარია ამბობს, რომ 20 ივნისის აქციის მონაწილეებისთვის დაზარალებულის სტატუსის მინიჭება "სამართლებრივი პროცესია, სხვა ყველაფერი —მორალი". ამაზე გიორგი გახარიამ დღეს, 27 მაისს პარლამენტში ევროპული საქართველოს დეპუტატ ელენე ხოშტარიას კითხვის პასუხად განაცხადა:

"არ მინდა მორალში შესვლა, სხვა რამეზე ვსაუბრობ. მე ვფიქრობ, რომ სრულად არის სახელმწიფო სისტემების მუშაობის პრეროგატივაა ეს და ამ ნაწილში ჩემი სუბიექტური შეფასება ეკუთვნის თუ არა, არ შევალ. არც იმას ვიტყვი პასუხისმგებლობები და ვალდებულებები დაზარალებული ადამიანების მიმართ, სახელმწიფოს, ჩემიც პირადად, ორივე მხრიდან, რამხელაა, ან ამ მორალურ ვალდებულებებს ჩვენ რას ვუშვებით. მე ვფიქრობ, ამაზე ბევრი ითქვა უკვე. რა თქმა უნდა, ეს არ არის გავლილი თემა, ეს იქნება მუდმივი შემადგენელი ჩვენი წარსულის. ამას გარკვეული ნათელი სულ უფრო და უფრო მოეფინება".

საქართველოს ახალგაზრდა იურისტთა ასოციაციის განცხადებით, პროკურატურამ 20 ივნისის მოვლენების შედეგად 23 დაზარალებულს დაზარალებულის სტატუსი ისევ არ მიანიჭა. როგორც ორგანიზაციაში აცხადებენ, პროკურატურის უარს სასამართლოში გაასაჩივრებენ.

"დაზარალებულის სტატუსის ოფიციალურად მინიჭების გარეშე, აღნიშნული პირები მოკლებულნი არიან შესაძლებლობას, ეფექტიანად იყვნენ ჩართულნი სამართალწარმოების პროცესში, გაეცნონ საქმის მასალებს და გააკონტროლონ, რამდენად ქმედითია ის ნაბიჯები, რასაც პროკურატურა საქმის დროული გამოძიებისათვის დგამს", — აღნიშნავენ საიაში.