პრემიერმინსტრიმა, გიორგი გახარიამ დეპუტატ სალომე სამადაშვილის კითხვის პასუხად აღნიშნა, რომ მას საქართველოს საერთაშორისო პარტნიორების თარგმნის ექსკლუზიური უფლება არ აქვს. სამადაშვილმა პრემიერს ჰკითხა, მიაყენებდა თუ არა დარტყმას სტრატეგიულ პარტნიორებთან ურთიერთობას 8 მარტის შეთანხმების ჩაშლა.

"მე ისეთი შთაბეჭდილება მრჩება, რომ თქვენ ამ ბოლო დროს მოიპოვეთ ექსკლუზიური უფლება ჩვენი საერთაშორისო პარტნიორების თარგმნის. სამწუხაროდ, თუ საბედნიეროდ თქვენ ესეთი ექსკლუზიური უფლება არ გაქვთ და ჩვენ, მეც პირადად მათ შორის უფრო მჭიდრო ურთიერთობა მაქვს მათთან", — თქვა გიორგი გახარიამ.

პრემიერმა აღნიშნა, რომ საერთაშორისო პარტნიორები პირველ რიგში, საქართველოს მეგობრები არიან და არა ნაციონალური მოძრაობის და ეს ადამიანები ობიექტურად შეაფასებენ 8 მარტის შეთანხმებას.

დეპუტატმა სალომე სამადაშვილმა კითხვის დასმის დროს გაიხსენა ამერიკის პრეზიდენტის დონალდ ტრამპის 26 მაისის მილოცვა და იმედი გამოთქვა, რომ მასაც ნაციონალური მოძრაობის მხადამჭერობას არ "დააბრალებდნენ". სამადაშვილმა თქვა, რომ საერთო ღირებულებები დღეს მთავარი საკითხია სტრატეგიულ ურთიერთობებში.

"ამ ფონზე მე მაინტერესებს თქვენგან პასუხი — 8 მარტის შეთანხმების ჩაშლა, რომლის ნაწილი არის პოლიტიპატირმების და მათ შორის რურუას გათავისუფლება, მიაყენებს თუ არა დარტყმას თქვენს სტრატეგიულ ურთიერთობებს დასავლელ პარტნიორებთან, მაშინ, როდესაც თქვენ ხართ და ჩვენი სახელმწიფოც სასიცოცხლოდ დამოკიდებული იმ დახმარებაზე, რომელიც მათ უნდა გაუწიონ ქართველ ხალხს", — თქვა სალომე სამადაშვილმა.

დღეს, 27 მაისს პრემიერ-მინისტრი პარლამენტის წინაშე მოხსენებით წარსდგება. ის კორონავირუსის პანდემიის წინააღმდეგ გადადგმულ ნაბიჯებსა და უწყებათაშორისი საკოორდინაციო საბჭოს გატარებულ ზომებზე საუბრობს.