ევროპული საქართველოს ერთ-ერთი ლიდერის, გიგა ბოკერიას თქმით, მთავრობის ნაცვლად ლობისტების მიერ სტრატეგიული პარტნიორებისთვის წერილის მიწერა სამარცხვინო და ავტორიტატული რეჟიმებისთვის დამახასიათებელია.

მან გიორგი გახარის ჰკითხა, ვინ ურჩია, რომ მათ ნაცვლად პარტნიორებს წერილები ლობისტებმა მიწერონ.

"მე ცოტა ხნის წინ ვნახე თქვენი ლობისტების მიერ მიწერილი წერილი შეერთებულ შტატებში, ჩვენს სტრატეგიულ პარტნიორებთან. ჯერ ერთი, მინდა გკითხოთ, რომ ვინ გირჩიათ, მთავრობის მაგივრად ლობისტი მიმართავდეს პარტნიორებს? ეგ ითვლება სამარცხვინოდ და ავტორიტატული რეჟიმების დამახასიათებელ ამბად. მინდა, უბრალოდ, გაგიზიაროთ. ლობისტმა შეიძლება გირჩიოს: როგორ ილაპარაკო, რა სტრატეგია გქონდეს, ვის დაგიკავშირდნენ, მაგრამ წერილებს წერს მთავრობა", — განაცხადა ბოკერიამ.

ქართულმა ოცნებამ ლობისტური ჯგუფის, DCI Group-ის, საშუალებით საერთაშორისო პარტნიორებს განცხადებით მიმართა, რომ ოპოზიციას შეთანხმების შესრულებისკენ მოუწოდონ. წერილში ნათქვამია, რომ ოპოზიცია 8 მარტის შეთანხმების შესრულებას არ აპირებს. აღნიშნული განცხადება აშშ-ს იუსტიციის დეპარტამენტის გვერდზე გამოქვეყნდა.