დამოუკიდებლობის დღისადმი მიძღვნილ ღონისძიებაზე პრეზიდენტმა, სალომე ზურაბიშვილმა განაცხადა, რომ საგანგებო მდგომარეობის გამოცხადების მიუხედავად, საქართველოს არც ერთ ეტაპზე არ დაურღვევია დემოკრატიის პრინციპები. მისი თქმით, ადამიანის უფლებების შეზღუდვა, რომელიც თავისთავად ახასიათებს საგანგებო მდგომარეობას, ჩვენს შემთხვევაში მინიმუმამდე იქნა დაყვანილი.

"გადაადგილების უფლება შეიზღუდა მხოლოდ ნაწილობრივად და სადაც აუცილებელი იყო. არ გამოცხადებულა სრული კარანტინი; არ შეზღუდულა სიტყვისა და გამოხატვის თავისუფლება, არც აღმსარებლობის თავისუფლება", — განცხადა ზურაბიშვილმა.

მანვე აღნიშნა, რომ დროულად გაუქმდა საგანგებო მდგომარეობა, რომ საკონსტიტუციო ცვლილებები შეთანხმებისამებრ გატარდეს.

"სწორედ ეს მიდგომები განასხვავებს დემოკრატიულ ქვეყნებს ავტორიტარულისგან. ყველას შეგვიძლია ვიამაყოთ ამით, და იმით, რომ საზოგადოებამ ბოლომდე გაითავისა შეზღუდვების აუცილებლობა და მოწოდების სიმაღლეზე დადგა. ასეთი დამოკიდებულება განვითარებული საზოგადოებისთვისაა დამახასიათებელი", — აღნიშნა მან.

ოპოზიციის ნაწილი ხშირად აკრიტიკებდა მთავრობას საგანგებო მდგომარეობის გახანგრძლივებისა და მანიფესტაციის უფლების შეზღუდვის გამო.