კულტურული მემკვიდრეობის ძეგლები და ელექტრონული მუსიკა ბევრის წარმოდგენით ერთმანეთისგან ძალიან შორს დგას და ხშირად, წარმოუდგენელიც კია, როგორ შეიძლება მათ რაიმე საერთო მოვუძებნოთ. თუმცა, როგორც აღმოჩნდა, თუ ამ ორ ელემენტს ისეთ გამორჩეულ იდეასაც დაამატებ, როგორიც შენი კულტურის მსოფლიო მასშტაბით პოპულარიზაციაა, საინტერესო და ორიგინალურ პროდუქტს მიიღებ. სწორედ ამ კონცეფციაზე დაყრდნობით დაიბადა GR Music, ქართული პროექტი, რომელიც ჩვენი ისტორიის ექოს ადგილობრივი არტისტების ცოცხალ სეტებში გვასმენინებს.

თანამედროვე და ძველი კულტურის ელემენტების შერწყმაზე ადრე უკვე მოგიყევით. თუმცა, თუკი ჯერაც არ გსმენიათ GR Music-ზე, გეტყვით, რომ ეს Georgian Rave-ის პროექტია, რომლის ფარგლებში ქართული უნიკალური ისტორიული ადგილების ფონზე ცოცხალი სეტები ეწყობა. საბოლოო პროდუქტი კი მსმენელამდე შთამბეჭდავი ვიდეოების სახით აღწევს.

GR Music-მა ქართველ მუსიკოსებთან — Toke, Michailo და Mind Static-თან ერთად ლაივ სეტები სამშვილდედან, უფლისციხიდან და თბილისის ანძიდან უკვე მოაწყო. სულ ბოლოს კი კიდევ უფრო ორიგინალური პროექტი შემოგვთავაზა და კარანტინის დროს დაცარიელებული ქალაქის გულში სრული სიჩუმე Generali Minerali-ს მუსიკით დაარღვია.

"კარანტინის გამო თბილისში გამოვიკეტეთ, ვეღარ ვახერხებდით, წავსულიყავით სხვადასხვა ადგილებში და სეტები მოგვეწყო, თუმცა, გაჩერება არ გვინდოდა. არ გვინდოდა კომენდანტის საათის დროს დაცარიელებული ქალაქის და ქუჩების გადაღების შანსი ხელიდან გაგვეშვა", — გვიყვება პროექტის დამფუძნებელი გიორგი დეკანოიძე.

Generali Minerali ქართველი არტისტია, რომელსაც ლაივების შესრულების კუთხით განსაკუთრებული ადგილი უჭირავს თანამედროვე შემსრულებლებს შორის. ამჯერად კი ცარიელი თბილისის ფონზე მან 20-წუთიანი ლაივ სეტი შემოგვთავაზა.

ფოტო: Georgian Rave

როგორც Georgian Rave-ში გვიყვებიან, წინასწარ არასდროს იციან, რას დაუკრავს მათ მიერ შერჩეული მუსიკოსი. ისინი მხოლოდ ლაივის შემსრულებელ არტისტებს არჩევენ, დანარჩენი კი სიურპრიზად რჩება.

მალე GR Music ლაივ სეტებს ისევ კულტურული მემკვიდრეობის ძეგლებიდან შემოგვთავაზებს. გარდა ამისა, პროექტის ფარგლებში დათო ევგენიძისა და დიჯეის კოლაბორაციაც იგეგმება . მანამდე კი მოუსმინე ისტორიის ექოს სამშვილდედან

უფლისციხედან

თბილისის ტელე-ანძიდან