საპარლამენტო ფრაქცია, დამოუკიდებელი დეპუტატების სახელით ზვიად კვაჭანტირაძემ სალომე ზურაბიშვილს შეზღუდვების შესახებ კანონპროექტზე ვეტოს გამოყენებას სთხოვს.

კვაჭანტირაძის თქმით, დამოუკიდებელი დეპუტატები მზად არიან საჭიროების შემთხევაში პრეზიდენტს შეხვდნენ და დამატები განმარტებები გააცნონ.

"მე ძალიან დიდი ეჭვი მიჩნდება, რომ რაღაცები უკვე წინასწარ არის შეთანხმებული და ძალიან არ მინდა ამაზე ვიფიქრო. ჩვენ, კოლეგებმა მოვითათბირეთ აქ და ვიდრე საკონსტიტუციო სასამართლოს დაველოდებით, რასაც ნებისმიერ შემთხვევაში გავაკეთებთ, თუ სხვა გამოსავალი არ დაგვრჩება, მანამდე ჩვენ მივმართავთ საქართველოს პრეზიდენტს, ქალბატონ სალომე ზურაბიშვილს, რომ პირველად თავისი პრეზიდენტობის მანძილზე, გამოიყენოს ვეტოს უფლება და არ მისცეს საშუალება ამ კანონს, რომ იგი იყოს აღსრულებაში მოყვანილი", — განაცხადა კვაჭანტირაძემ.

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.

ცვლილებებს პარლამენტი დაჩქარებული წესით განიხილავს. კანონპროექტის პირველი მოსმენა დღევანდელ პლენარულ სხდომაზეა დაგეგმილი, ხოლო სავარაუდოდ ხვალ, 22 მაისს, მეორე და მესამე მოსმენა იქნება, შემდეგ კი საბოლოო კენჭისყრა.