დაავადებათა კონტროლის ეროვნული ცენტრის დირექტორის ამირან გამყრელიძის თქმით, მიმდინარეობს მუშაობა, რომ აუცილებელი ტესტირების სამიზნე ჯგუფებს სატვირთო მანქანები მძღოლებიც დაემატოს. ამ თემაზე მან სპეციალურ ბრიფინგზე ისაუბრა.

"მიმდინარეობს მუშაობა, რომ აუცილებელი ტესტირების ე.წ. სამიზნე ჯგუფებს დაემატოს ტრაილერის მძღოლები. ამაზე ვმუშაობთ და ლოჯისტიკური სქემა ლაგდება. დღესაც მიმდინარეობდა მუშაობა შესაბამის სტრუქტურებთან, ეს არის საბაჟოსა და საავტომობილო გადაზიდვების შესაბამისი სამსახურები. საუბარია არა ტრანზიტულ, არამედ იმ მძღოლებზე, რომლებიც საქართველოში რჩებიან. ამ მძღოლების ტესტირება იქნება ხელმისაწვდომი", — თქვა ამირან გამყრელიძემ.

გამყრელიძის განმარტებით, ასეთი დღეში დაახლობით, 250-დან 300-მდე ადამიანი იქნება. მისი თქმით, ტესტირება თავიდან აგვაცილებს რისკს, რადგან საქართველოს გარშემო მყოფ ქვეყნებში ეპიდსიტუაცია არასახარბიელოა.

ამირან გამყრელიძემ აღნიშნა, რომ ამის შემდეგ ემზადებიან, რომ სტომატოლოგებისა და ფარმაცევტების ტესტირება დაიწყოს. მისი თქმით, სტომატოლოგები შესაბამის გადამზადებას გაივლიან, რათა ნიმუშები თავად აიღონ.